Wananchi wa Ecuador wamekataa pendekezo la kuruhusu kurejeshwa tena nchini humo vituo vya kijeshi vya nchi za kigeni. Hayo ni kwa mujibu wa matokeo ya awali ya kura ya maoni, ambapo hesabu za asilimia 90 ya kura zinaonyesha kuwa karibu theluthi mbili ya walioshiriki wamepiga kura ya “hapana” kupinga pendekezo hilo.
Matokeo hayo yanatafsiriwa kama pigo kwa Rais Daniel Noboa, ambaye amesema, kushirikiana na madola ya kigeni, ikiwa ni pamoja na kuweka vituo vyao vya kijeshi ndani ya ardhi ya Ecuador ni muhimu katika kupambana na uhalifu uliopangwa.
Kadhia nyingine iliyopigiwa kura ya maoni ya Waecuador ya kuitisha bunge ili kuandika upya katiba, nayo pia imekataliwa kwa zaidi ya asilimia 61.
Rais Noboa amekiri kushindwa kwa kampeni yake ya kutaka kurejesha vituo vya kijeshi vya kigeni, kupitia andiko aliloweka kwenye mtandao wa X akisema: “tunaheshimu matakwa ya Waecuador. Ahadi yetu haibadiliki; inaimarika. Tutaendelea kupigania bila kuchoka nchi ambayo mnastahili, kwa suhula tulizonazo.”
Matokeo ya kura hiyo ya maoni yanalizuia jeshi la Marekani kurudi kwenye kambi ya anga ya Manta iliyoko kwenye pwani ya Pasifiki, ambayo hapo awali ilikuwa kitovu cha shughuli za kampeni ya Washington za kiitwacho mapambano dhidi ya madawa ya kulevya.
Mnamo mwaka 2008, Ecuador ilipiga marufuku uwepo wa kambi za kijeshi za kigeni ndani ya ardhi yake…/