Kampuni ya Israel inayoongoza kwa utengenezaji wa silaha, Elbit Systems, imetangaza ongezeko kubwa la faida iliyopatikana katika muda wa robo mwaka kufuatia miezi kadhaa ya ushiriki wa kampuni hiyo katika mauaji ya halaiki ya Israel huko Gaza kupitia utoaji silaha, zana za kijeshi na mifumo ya ufuatiliaji, huku ikipata mikataba mipya barani Ulaya.
Mrundikano wa oda za kampuni hiyo ya teknolojia yenye makao yake katika mji wa Haifa umeongezeka hadi dola bilioni 25.2, huku asilimia 69 ya jumla ya oda hizo ikitoka katika masoko nje ya Israel.
Bezhalel Machlis, Mkurugenzi wa Elbit Systems amesema kuwa utendaji wa kampuni hiyo unaangazia mikataba mikubwa ambayo kampuni imepata kote Ulaya na kutoka kwa wateja wa kimataifa, inayochochewa na bajeti zinazoongezeka za kijeshi.
Kampuni ya Elbit imetoa silaha mbalimbali, ndege zisizo na rubani (droni) na mifumo ya ujasusi wakati wa mauaji ya kimbari ya Wapalestina katika Ukanda wa Gaza.
Mauzo ya silaha ya kampuni hiyo ya utawala wa Kizayuni kwa nchi za Ulaya ambazo ni soko la pili kwa ukubwa duniani la silaha za Israel yameongezeka kutoka dola milioni 430 hadi milioni 536 ambayo ni sawa na asilimia 28 ya mapato yote.
Elbit Systems imesema kuwa asilimia 66 ya oda za silaha ni katika uga wa kimataifa na imezidisha uwepo wake barani Ulaya, katika maeneo ya Balkan na nchini Uingereza kupitia mikataba mipya iliyofichuliwa katika miezi ya karibuni.