Shirika la habari la kitaifa nchini Lebanon limesema shambulizi la droni kutoka Israel, lililenga gari moja lililokuwa limeegeshwa karibu na msikiti katika kambi ya wakimbizi ya Ein el-Hilweh, nje ya mji wa pwani wa Sidon nchini humo.
Kulingana na Wizara ya afya ya taifa hilo, watu 13 waliuawa na wengine kadhaa walijeruhiwa katika shambulio hilo la angani. Wizara hiyo haikutoa maelezo zaidi juu ya maafa ya shambulizi hilo. Hili linasemekana kuwa shambulizi baya kuwahi kutokea Lebanon, tangu makubaliano ya usitishaji vita kati ya Israel na Hezbollah mwaka mmoja uliopita.
Wapiganaji wa Hamas katika eneo hilo, waliwazuwia waandishi habari kufika katika eneo la tukio, huku magari ya kubebea wagonjwa yakionekana yakiingia huko kuwaondoa waliojeruhiwa pamoja na maiti zilizokuwa zimetapakaa barabarani.
Israel yasema imeshambulia eneo la mafunzo la Hamas
Huku hayo yakiarifiwa jeshi la Israel, limesema limeshambulia tu eneo la mafunzo la wanamgambo wa Hamas lililokuwa linatumiwa kupanga mashambulizi dhidi ya Israel na jeshi lake.
Jeshi hilo limeongeza kuwa litaendelea kuwashambulia wanamgambo hao mahala popote wanapofanyia operesheni zao. Hata hivyo Hamas imekosoa shambulizi hilo, linalodai lililenga eneo la michezo na kukanusha kuwa lilikuwa eneo lao la mafunzo.
Miaka miwili iliyopita mashambulizi ya Israel, Lebanon yalisababisha mauaji ya wanamgambo wa Hezbollah pamoja na wale wa Hamas.
Hamas iliongoza mashambulizi ya Oktoba 7, 2023 Kusini mwa Israel yaliyosababisha mauaji ya watu 1,200. Mashambulizi ya kulipiza kisasi kutoka kwa Israel, dhidi ya kundi hilo katika Ukanda wa Gaza, limechochea mzozo unaonedelea sasa Mashariki ya Kati. Mashambulizi ya Israel katika Ukanda huo yamesababisha mauaji ya watu zaidi ya 60,000 wengi wao wakiwa wanawake na watoto.