Tume hiyo iliyoundwa jana, itaongozwa na Jaji Mkuu Mstaafu, wa Mahakama Kuu ya Tanzania, Mohamed Chande Othman, na wajumbe saba, akiwamo Jaji Mkuu Mstaafu Ibrahim Hamis Juma, Katibu Mkuu Kiongozi, Balozi Ombeni Sefue, IGP Mstaafu, Said Mwema, na Dkt Stwergomena Tax, aliyekuwa Waziri wa Ulinzi na Jeshi la Kujenga Taifa na Paul Meela, mwanadiplomasia na Luteni wa Jeshi mstaafu.
Licha ya kusubiriwa kwa hamu kwa kauli ya Rais kuhusu vurugu za Oktoba 29, lakini kuundwa kwa tume hii kumeibua maswali na wasiwasi kuhusu ubora wake, kufuatia tume hiyo kusheheni viongozi wastaafu walioshika nyadhifa kubwa serikali.
Kwa upande wao chama cha ACT-Wazalendo, wametoa tamko lao wakidai kutoshiriki wala kutoa ushirikiano wa aina yoyote kwa tume hiyo, kwani wanaamini tume hiyo ni chombo kisicho huru kinachotegemea maagizo ya serikali. Kiongozi Mkuu wa ACT-Wazalendo, Dorothy Semu amesema.
“Tunataka tuwe na kundi la tume ambalo litaangalia tukio zima na matokeo yake kwa namna ambayo haitakuwa na upendeleo wala namna itakayokuwa ya kujisafisha”
Wasiwasi waibuka kuhusu tume ya kuchunguza mauaji
Rais Samia amechukua hatua ya kuunda tume hiyo kwa mamlaka aliyonayo chini ya kifungu cha tatu cha sheria ya Tume za Uchunguzi, sura ya 32. Wachambuzi wa masuala ya siasa na uongozi Tanzania, nao wameibuka wakionyesha wasiwasi wao dhahiri kuhusu tume hiyo.
Mkurugenzi wa Jumuisho la Vijana Tanzania, (TYC) Lenin Kazoba, amesema, tume hiyo ilihitaji uwakilishi wa vijana.
“walitakiwa wawepo kwenye hiyo tume vijana kwani kwa namna moja ama nyingine wao ndiyo nguvu kazi, kuwe na uwiano kwa sababu wengi ndiyo walikuwa mstari mbele na sisi tuliosimamia uchaguzi tuliwaona”
Hii si mara ya kwanza kwa Rais kuunda tume, Desemba mwaka jana,aliunda tume kushughulilia mzozo wa masuala ya ardhi na uhamaji wa Hifadhi ya Ngorongoro. Mapema mara baada ya kuingia madarakani mwaka 2021, aliunda tume ya kuangalia namna bora ya Tanzania kupata usawa wa kijinsia wakati wa uongozi wake ili kutokomeza umaskini miongoni mwa wanawake.
Taifa hili la Afrika Mashariki liligubikwa na vurugu za maandamano kuanzia kuanzia Oktoba 29, 2025, siku ya uchaguzi hadi Novemba 3, zilizosababisha vifo vya watu kadhaa na uharibifu wa mali za umma na binafsi.