Haikuwa Namanga ambayo kwa kawaida ni kitovu cha biashara baina ya nchi mbili jirani, isipokuwa uwanja wa maandamano ya vijana wa Kenya wakitishia kuingia Tanzania kwa nguvu kwa kutaka kuwatetea wapinzani wa serikali ambao vijana hao walisema walikuwa wametengwa kando katika uchaguzi mkuu nchini Tanzania.
Safari hii vijana wa Kenya walitaka kuvuuka si kwa biashara kama kawaida bali kuonyesha mshikamano wao na kambi ya upinzani nchini Tanzania. Makabiliano yakazuka na baadhi ya maisha kupotea na wengi kujeruhiwa vibaya.
“Polisi wametufyatua risasi za kutoa machozi, wamewapiga risasi vijana wa Kenya katika mpaka, siku hii imekuwa mbaya.”
Kuona hali ikizidi kuharibika polisi wa Kenya waliingilia kati na kuzuia umati huo wa vijana wa Kenya kuingia Tanzania. Hali hii iliyoshuhudiwa katika mpaka wa Namanga inaashiria kuwa ukosefu wa amani katika nchi moja unasambaa katika nchi jirani. Na pia mapambano ya demokrasia yanavuuka mipaka.
Serikali ya Tanzania ilitumia mbinu iliyozoeleweka kwenye mataifa yenye tawala kama zake kwa kuzima mawasiliano ya mitandaoni. Kitendo hiki cha kuzima mitandao yote kiliyafanya mawasiliano kuwa magumu na watu wasijue kile kilichokuwa kikiendelea ndani ya taifa hilo la Afrika Mashariki.
Hata hivyo watetezi na wanaharakati wa haki za binadamu pamoja na waandishi wa habari mjini Nairobi waliingilia kati kwa kile walichoamini ni kuwasaidia raia wa Tanzania kwa kusambaza picha na video walizozipata kutoka huko, ambazo walihisi serikali ya Tanzania ilikuwa ikijaribu kuzificha.
Waandishi Kenya waisaidia Tanzania kujua yanayoendelea nchini mwao
Mwandishi mkongwe wa habari nchini Kenya, Yassin Juma, alisema huu ulikuwa wakati mgumu:
“Wakati machafuko yakiendelea nchini Tanzania wanaharakati nchini Kenya walijikusanya na kujipanga mjini Nairobi ili kuhakikisha wanautangazia ulimwengu kile kilichokuwa kinaendelea huko Tanzania hasa kwa sababu vyombo vya habari vilikuwa vimefungiwa kutangaza matukio huku internet ikiwa imefungwa.”
Kazi yao iliufanya ulimwengu uendelee kuelewa jinsi haki za binadamu zilivyokuwa zinakandamizwa ikiwa ni pamoja na namna vyombo vya usalama vilikuwa vikiwashambulia na kuwaua waandamanaji kisha kuficha miili yao.
Hatua za mashirika ya kiraia nchini Kenya zilikwenda mbali zaidi kwa kushinikiza uwajibishaji wa uongozi wa Jumuiya ya Afrika Mashariki ili kutekeleza itifaki zao kuhusu utawala na haki za binadamu.
Itifaki ya jumuiya hiyo inazitaka nchi wanachama kuhakikisha utawala bora, demokrasia na utawala wa sheria pamoja na haki kwa wote, lakini sasa wanaharakati wa Kenya wanasema Tanzania imepoteza imani hiyo, anasema Martha karua, mwanasiasa na mwanasheria nchini Kenya:
“Tunaona hali mbaya katika kanda nzima…kwenu viongozi wa Afrika mashariki…hamuwezi kuzungumzia umoja wakati mnaendelea kuwaweka jela, kuwateka na kuwatesa wananchi wenu na kulifanya kosa la jinai mtu anaposafiri kutoka nchi moja kwenda nyingine, kitu ambacho kimsingi ndiyo sababu ya kuwepo muungano huu.”
Swali linabaki pale pale ikiwa nguvu na mshikamano huu wa kuvuuka mipaka utafanikiwa kuwawajibisha viongozi ambao wanaonekana kujipanga kuimarisha tawala zao na kama hali hii inaweza kupanga upya mustakabali wa demokrasia katika Jumuiya ya Afrika Mashariki.