Waziri wa Mambo ya Nje wa Jamhuri ya Kiislamu ya Iran, Sayyid Abbas Araghchi amesema: “hatutakubali kwa namna yoyote ile kushusha urutubishaji wa urani hadi kiwango cha sifuri kwa sababu hili limekuwa ni jambo la fakhari na heshima kwa taifa, tumetumia gharama nyingi sana za kimaada na kimaanawi kwa ajili yake, na tumepoteza wanasayansi kadhaa waliouawa shahidi kwa ajili ya kulidumisha”.
Araghchi ameeleza hayo katika ujumbe alioweka kwenye ukurasa wake wa Telegram na kusisitizia kwa kusema: “tunayachukulia makubaliano yoyote ya kushusha urutubishaji wa urani hadi kiwango cha sifuri kuwa ni sawa na kufanya uhaini na usaliti; hatutasalimu amri kwenye hilo”.
Waziri wa Mambo ya Nje wa Iran ameendelea kueleza katika ujumbe wake huo kwamba, ushirikiano wa Jamhuri ya Kiislamu na Wakala wa Kimataifa wa Nishati ya Atomiki, IAEA hautahusisha kabisa vituo vya nyuklia vilivyoshambuliwa; na kwamba ushirikiano wa ukaguzi itakaotoa Iran kwa IAEA utahusu vile vituo ambavyo havikushambuliwa na utafanyika kwa kufuata taratibu zilizoainishwa kwenye sheria na kanuni za wakala huo wa Umoja wa Mataifa.
Hayo yanajiri katika hali ambayo, hivi karibuni Araghchi alisistiza kwamba, Wakala wa Kimataifa wa Nishati ya Atomiki, IAEA lazima utekeleze maagizo uliyokabidhiwa ya kiufundi, ujiepushe na mielekeo ya kisiasa, na ukatae mashinikizo yanayotolewa na Marekani na washirika wake wa Ulaya.
Waziri wa Mambo ya Nje wa Iran alitoa wito huo zikiwa zimesalia siku chache kabla ya kufanyika mkutano ujao wa Bodi ya Magavana ya IAEA, ambapo Marekani na Troika ya Ulaya, inayoundwa na Uingereza, Ufaransa, na Ujerumani, zinatarajiwa kuwasilisha azimio dhidi ya Iran kuhusu ushirikiano wake na wakala huo.
Araghchi amekumbusha kuwa, siku zote Tehran imekuwa ikitumia muelekeo wa “ujengaji na uwajibikaji” katika ushirikiano wake na IAEA na kwamba muelekeo huo inapasa ufuatwe pia na pande zote zinazohusika katika kadhia ya nyuklia ya Iran…/