Eswatini imethibitisha kupokea dola milioni 5.1 kutoka Washington kama sehemu ya makubaliano ya kupokea wahamiaji waliofukuzwa Marekani licha ya kutokuwa na uhusiano wowote na taifa hilo la kusini mwa Afrika.
Waziri wa Fedha, Neal Rijkenberg, aliwaambia wabunge Jumatatu kuwa fedha hizo ni sehemu ya makubaliano ya pande mbili yaliyosainiwa mwezi Mei. Mnamo Septemba, shirika la Human Rights Watch liliripoti kuwa serikali ya Eswatini ilikubali kupokea hadi watu 160 kutoka nchi za tatu waliotimuliwa Marekani, na kwamba fedha hizo zingetumika “kuimarisha uwezo wa usimamizi wa mipaka na uhamiaji.”
Akijibu swali bungeni kuhusu mpango huo, Rijkenberg alisema Wizara ya Fedha haikuhusishwa katika hatua yoyote.
Waziri huyo aliiambia Reuters Jumanne kuwa muamala huo ulisimamiwa na ofisi ya waziri mkuu, na yeye alifahamishwa tu baada ya shughuli kukamilika.
Wakosiaji wa serikali wamesema kutokana na kutohusishwa wizara ya fedha, kitita hicho ni hongo iliyotolewa kwa maafisa wa serikali.
Rais wa Marekani Donald Trump amekuwa akifanya makubaliano yenye utata na nchi kadhaa za Afrika ili kupokea wahamiaji ambao Washington inasema hawastahili kuendelea kuishi Marekani.
Guinea ya Ikweta pia imepokea dola milioni 7.5 kutoka utawala wa Trump kwa kukubali raia wasiokuwa wake waliorejeshwa Marekani, kwa mujibu wa Seneta Jeanne Shaheen. Sudan Kusini, Ghana, Rwanda na Uganda pia zimekubali makubaliano ya kupokea idadi fulani ya wahamiaji waliorejeshwa.
Mnamo Julai, Idara ya Usalama wa Ndani ya Marekani iliwafukuza wanaume watano kutoka Vietnam, Jamaica, Laos, Cuba na Yemen, ambao wote walikuwa wamehukumiwa makosa mbalimbali kuanzia ubakaji wa mtoto hadi mauaji, na kuwapeleka Eswatini, utawala wa mwisho wa kifalme barani Afrika. Watu wengine 10 waliripotiwa kutumwa huko mwezi uliopita, wakati serikali ya Eswatini ikikabiliwa na kesi iliyofunguliwa na mawakili wa haki za binadamu wanaodai kwamba mpango huo wa “kisiri” ni kinyume cha katiba.
Kwa mujibu wa mawakili wa wahamiaji hao, isipokuwa mmoja aliyepelekwa Jamaica, wengi wao bado wanashikiliwa bila mashtaka na bila kupata ushauri wa kisheria mara kwa mara.
Serikali ya Afrika Kusini, nchi jirani ya Eswatini, pia imeupinga mpango huo, ikionya kwamba wahamiaji hao ambao maafisa wa Marekani wamewaita “wahalifu wa kinyama,” wanaweza kuvuka kwa urahisi katika mpaka na kuingia Afrika Kusini.