Kamishna Mkuu wa shirika la Umoja wa Mataifa la UNRWA amesema kwamba, usitishaji mapigano haujawa na athari yoyote katika kuboresha hali ya watu wa Ghaza, na kwamba mateso makubwa ya binadamu katika ukanda huo yanaendelea na misaada inayoingizwa ni midogo sana hasa wakati huu wa kuwadia msimu wa baridi kali.
Kwa mujibu wa Shirika la Habari la Tasnim, Philip Lazzarini, amesema hayo katika hotuba yake ya kuzungumzia mgogoro mbaya wa kibinadamu unaendelea hivi sasa katika Ukanda wa Ghaza licha ya kuanza kutekelezwa makubaliano ya kusitisha mapigano kwa zaidi ya mwezi mmoja, na kusisitiza kuwa, wananchi wa Ghaza wanaendelea kupata mateso makubwa licha ya vita kusitishwa kutokana na kwamba Israel inaendelea kuzuia misaada kuingia kwenye ukanda huo.
Ameongeza kwa kusema: Watu wa Ghaza wamevumilia miaka miwili ya vita vya kikatili, mabomu na kuhamahama, na tangu makubaliano ya kusitisha mapigano yalipoanza kutekelezwa, hakuna msaada wa kutosha uliowafikia watu hao, na kile kinachoruhusiwa na Israel kuingia humo ni kidogo sana hakikidhi hata chembe mahitaji ya wakazi wa ukanda huo. Zaidi ya asilimia 96 ya wananchi wa Ghaza wanategemea kikamilifu misaada ya kimataifa kwa ajili ya kuendelea na maisha.
Philip Lazzarini ameendelea kusema kuwa, Ukanda wa Ghaza una changamoto kubwa hivi sasa. Misaada ya kimataifa haifiki kwa kiasi cha kutosha, na ingawa sekta binafsi zinaingiza Ghaza baadhi ya mahitaji, lakini wakazi wengi hawana uwezo wa kununua chakula kutoka sokoni kutokana na bei zake kuwa juu sana.
Afisa huyo wa Umoja wa Mataifa amesisitiza kwamba mateso huko Ghaza yataongezeka zaidi wakati wa msimu uliowadia wa baridi kali.