Azimio jipya la Baraza la Usalama la Umoja wa Mataifa (UNSC), linaloruhusu kile kinachoitwa kikosi cha kimataifa kutumia “mbinu zozote zinazohitajika kutekeleza wajibu wake” katika Ukanda wa Gaza limeelezwa na wataalamu kama sura nyingine ya “ukoloni” katika historia ya Palestina.
Azimio hilo lililopitishwa Jumatatu linampa Rais wa Marekani Donald Trump usukani juu ya eneo hilo lililozingirwa, kwa kutumia kikosi cha wanajeshi wa mataifa mbalimbali kijulikanacho kama International Stabilization Force (ISF) kusimamia mpango wake wa vipengele 20 kuhusu mustakabali wa eneo hilo.
Avi Shlaim, mwanahistoria wa Uingereza mwenye asili ya Israeli, alisema azimio hilo ni “mpango wa kitabaka wa kikoloni unaopuuza kabisa haki na matarajio ya watu wa eneo hilo. Kwa namna fulani, ni kama Mandate ya Uingereza kwa Palestina.”
“Ni kuweka masharti kwa kitu ambacho ni haki yenyewe: haki ya kujitawala. Kimsingi UN, ambayo inapaswa kulinda sheria za kimataifa, inageuzwa kuwa chombo kinachozivuruga,” alisema Daniel Levy, mchambuzi wa Uingereza mwenye asili ya Israeli na mwananegosheni wa zamani wa amani, alipoongea na Middle East Eye (MEE).
Kupitia kura ya 13-0 huku nchi mbili zikijizuia, Azimio 2803 linaweka mpango wa kuunda Baraza la Amani litakalosimamia wanajeshi wa kimataifa, wataalamu wa Kipalestina na kikosi cha polisi cha ndani kwa kipindi cha miaka miwili.
Azimio hilo limekataliwa na Hamas na makundi mengine ya mapambano ya Kipalestina, lakini linatiwa mkono na Mamlaka ya Palestina (PA).
Russia na China zilijizuia kupiga kura kwenye azimio hilo lenye utata, huku Moscow ikilitaja kama “ukoloni.”
Baadhi ya nchi za Kiarabu pia zimepinga pendekezo hilo, zikionyesha hofu kuhusu baraza jipya linalotarajiwa kuunda utawala wa muda wa eneo hilo bila nafasi yoyote ya mpito kwa Mamlaka ya Palestina.
Azimio hilo limepingwa pia na harakati na makundi ya kupigania ukombozi ya Palestina. Harakati ya Mapambano ya Kiislamu ya Palestina, Hamas, imepinga vikali azimio hilo, ikisema kwamba linalazimisha usimamizi wa kimataifa katika eneo hilo la Palestina. Taarifa iliyotolewa na Hamas imesema azimio hilo la UN halikidhi matakwa na haki za kisiasa na kibinadamu za watu wa Palestina.
Harakati hiyo imesisitiza kwamba kikosi chochote cha kimataifa kinapaswa kipelekwe kwenye mipaka ya Gaza pekee ili kufuatilia usitishaji mapigano chini ya usimamizi wa Umoja wa Mataifa.
“Kukipa kikosi cha kimataifa majukumu ndani ya Ukanda wa Gaza, ikiwa ni pamoja na kupokonya silaha za makundi ya mapambano, kunakipokonya sifa ya kutopendelea upande wowote, na kukifanya sehemu ya mzozo kwa niaba ya utawala vamizi,” imesema taarifa ya Hamas.
Mkataba huu ni awamu ya kwanza ya mpango wa vipengele 20 wa Trump kuhusu kusitisha mapigano Gaza, huku hatua nyingine zikitarajiwa kujadiliwa baadaye.
Tangu Oktoba 7, 2023, Israel imewaua angalau Wapalestina 69,000, wakiwemo watoto 21,000, katika mauaji yanayoungwa mkono na Marekani dhidi ya Gaza.