Shirika la Umoja wa Mataifa la Afya Duniani (WHO) pamoja na wadau wa Umoja wa Mataifa wametoa ripoti muhimu inayoonyesha kuwa ukatili dhidi ya wanawake ungali ni janga kubwa la haki za binadamu, kwa sababu takwimu za zaidi ya miaka 20 zinaonesha kutokuwepo kwa hatua kubwa zilizopigwa katika kupunguza ukatili huo.
Ripoti hiyo iliyotolewa mjini Geneva, imeandaliwa kwa kuchanganua data za kimataifa kuhusu mateso ya wanawake, ikifichua hali halisi ya tatizo ambalo limeendelea kudhoofisha usalama, afya na utu wa wanawake duniani.
Kwa mujibu wa ripoti hiyo, karibu theluthi moja ya wanawake duniani, yaani mmoja kati ya kila watatu, ikiwa ni zaidi ya wanawake milioni 840 amewahi kukumbana na ukatili wa kingono au kijinsia kutoka kwa mwenzi, kiwango ambacho hakijabadilika tangu mwaka 2000.
Katika mwaka uliopita wa 2024, wanawake milioni 316 (11%) walifanyiwa ukatili na wenzi wa karibu, huku kupungua kwa tatizo hilo kukiwa kidogo sana kwa kipindi cha miaka 20.
Ripoti hiyo inaonyesha pia kuwa wanawake milioni 263 wamekumbana na ukatili wa kingono kutoka kwa wasiokuwa wenzi tangu wakiwa na umri wa miaka 15, ingawa idadi halisi huenda ikawa kubwa zaidi kutokana na unyanyapaa na hofu ya kuripoti.
Mkurugenzi Mkuu wa WHO, Dkt. Tedros Adhanom Ghebreyesus amesema: “ukatili dhidi ya wanawake ni mojawapo ya dhulma za tokea zamani na zilizoenea zaidi katika historia ya binadamu, na ungali ni kati ya dhulma zinazochukuliwa hatua chache; hakuna jamii inayoweza kujiona kuwa yenye haki, salama au yenye afya wakati nusu ya watu wake wanaishi kwa hofu. Kukomesha ukatili huu si suala la sera tu; ni suala la utu, usawa na haki za binadamu. Kila takwimu inawakilisha mwanamke au msichana ambaye maisha yake yamebadilishwa milele. Kuwawezesha wanawake na wasichana si chaguo, ni sharti kwa amani, maendeleo na afya. Dunia salama kwa wanawake ni dunia bora kwa wote.”
Ripoti hiyo iliyotolewa na WHO na wadau wengine wa UN kabla ya siku ya kimataifa ya kutokomeza ukatili dhidi ya wanawake inayoadhimishwa tarehe 25 Novemba, ni utafiti mkubwa zaidi kuwahi kufanywa kuhusu aina kuu mbili za ukatili dhidi ya wanawake…/