Rais wa Ukraine Volodymr Zelensky amesema kuwa Marekani na Rais wake Donald Trump wana jukumu muhimu katika juhudi za kukomesha vita vya Urusi nchini Ukraine. Hii ni baada ya mazungumzo na Erdogan mjini Ankara.
Akitaja ushawishi wa Trump, Zelensky alisema tangu mwanzoni mwa mwaka huu, Ukraine imeunga mkono kila hatua muhimu na uongozi wa Trump, kila pendekezo dhabiti na la haki la kumaliza vita. Na ni Trump pekee na Marekani walio na nguvu ya kutosha ya kukomesha vita hivyo.
Zelensky alisema anamshukuru Erdoğan kwa kuandaa mkutano huo na kwa kuendelea kwa Uturuki kushiriki katika juhudi za kidiplomasia. Aliandika kwenye mtandao wa X kuwa “Tulijadili kwa undani njia halisi za kufikisha mwisho vita kwa njia ya heshima,”
Alikaribisha utayari wa Ankara kusimamia mazungumzo, akisema Erdogan amependekeza miundo ya mazungumzo ambayo Ukraine inaunga mkono na kwamba yuko wazi kwa “mifumo mingine yenye maana ambayo inaweza kutoa matokeo.” Anasema bila shaka walizungumza hasa kuhusu hali ya kidiplomasia. Michakato mingi sasa imeanzishwa. Wanajaribu kuhakikisha kuwa shughuli zote zinaelekezwa kwenye amani, kwa njia ya heshima na usalama wa uhakika.
Matamshi yake yamejiri baada ya ripoti za vyombo kudokeza kuwa Washington imekuwa ikishirikiana na Moscow nyuma ya pazia kuhusu pendekezo jipya la amani ambalo litahitaji maamuzi makubwa kutoka Kiev, ikiwa ni pamoja na uwezekano wa kuwachia ardhi yake zaidi. Kwa upande wake, Rais Erdogan alitoa wito kwa Kiev na Moscow kurejea kwenye meza ya mazungumzo nchini mwake. Erdogan alisema mazungumzo hayo ni muhimu ikizingatiwa athari kubwa za vita kwenye pande zote. Uturuki imewahi kuandaa mazungumzo hapo awali. Erdogan anaendeleza uhusiano wa karibu na Vladimir Putin.
Urusi yashambulia Ukraine na kuuwa 25
Na wakati Zelenky alikuwa ziarani kuendeleza juhudi za kidiplomasia, Urusi ilifanya mojawapo ya mashambulizi yake makali kabisa kuwahi kutokea magharibi mwa Ukraine. Ilifyatua zaidi ya droni 470 na makombora 48 usiku kucha. Watu 25 waliuawa katika mashambulizi hayo ya mji wa Ternopol, huku wengine karibu 73 wakijeruhiwa wakiwemo Watoto 16.
Kansela wa Ujerumani Friedrich Merz amelaani vikali mashambulizi hayo akisema ni vita vya ukatili mkubwa dhidi ya raia. Amesema hayo sio tena malengo ya kijeshi. “Anasema wanashuhudia ongezeko kubwa la mashambulizi ya Urusi dhidi ya miundombinu nchini Ukraine. Yanayoenea hadi magharibi mwa Ukraine. Hii inaonyesha kwamba Urusi, pamoja na vita vyake vya kigaidi, inaharibu miundombinu ya raia — hasa miundombinu ya nishati ya Ukraine — kwa kiwango kikubwa, na hii inafanywa sasa muda mfupi kabla au tayari wakati wa majira ya baridi kali.” Merz aliyasema hayo kwenye mkutano na Waziri Mkuu wa Sweden Ulf Kristersson mjini Berlin.
Ametoa wito kwa washirika wa Ulaya kufikia makubaliano kuhusu matumizi ya mali za Urusi ifikapo mwezi ujao, akisema ndio njia pekee mahsusi ya kuileta Moscow kwenye meza ya mazungumzo kwa lengo la kumaliza vita.
Wajumbe wa Marekani wawasili Kiev
Wakati huo huo, ujumbe wa kijeshi wa Marekani ulikuwa mjini Kiev jana usiku, huku Waziri wa Ulinzi wa Ukraine Denys Shmyhal akisema alikutana na alikutana na Afisa anayesimamia masuala ya Jeshi la Marekani Daniel Driscoll na kuwafahamisha wageni hao kuhusu maendeleo mapya ya ndege zisizo na rubani za Ukraine.
Kundi hilo, kwa mujibu wa ripoti za vyombo vya habari nchini Marekani, linatarajiwa kukutana na Zelensky pindi atakaporejea nchini kutoka ziara yake ya kigeni.