Ikulu ya Afrika Kusini imesema kwa mara nyingine kwamba Rais Cyril Ramaphosa hataukabidhi uongozi wa G20 kwa kaimu balozi wa Marekani siku ya Jumapili, hatua inayoonyesha msimamo mkali wa Pretoria dhidi ya kile inachokiona kama kudharau protokali za kidiplomasia.
Mivutano imeongezeka baada ya Waziri wa Mambo ya Nje wa Afrika Kusini Ronald Lamola kusema hata kama Marekani itasusia mkutano wa G20, dunia inaweza kuendelea kufanya kazi ikiwa na Marekani au bila Marekani.
Kauli hiyo imetolewa wakati Rais Ramaphosa naye akisisitiza kuwa Afrika Kusini haitakubali kuburuzwa au kushinikizwa na Washington, akionyesha wazi wazi kwamba uhusiano kati ya mataifa hayo mawili uko katika kipindi kigumu.
Licha ya haya yote, jana Alhamisi Ramaphosa alinukuliwa akisema wamearifiwa na Marekani kwamba wanafikiria upya kuhusu uamuzi huo na majadiliano bado yanaendelea.
Marekani yasisitiza kwamba haitashiriki G20
Hata hivyo muda mfupi baadaye, serikali ya Rais Donald Trump ilisema hakuna mazungumzo yanayofanyika, na kwamba hakuna kiongozi wa ngazi ya juu wa Marekani atakayehudhuria mkutano huo.
Msemaji wa Ikulu ya White House, Karoline Leavitt amewaambia waandishi wa habari “Marekani haishiriki katika mazungumzo rasmi ya G20 Afrika Kusini Rais wa Afrika Kusini alisema maneno makali dhidi ya Marekani na Rais wake, jambo ambalo halijatufurahisha. Balozi wetu yupo pale tu kuthibitisha kwamba Marekani ndiyo itakayokuwa mwenyeji wa G20 ijayo na kupokea kijiti cha uongozi wa kundi hilo mwishoni mwa tukio.”
Kauli hiyo ya Marekani imemuibua Msemaji wa Ikulu ya Afrika Kusini, Vincent Magwenya ambaye katika ukurasa wake wa X amesisitiza kwamba Rais Ramaphosa hataukabidhi uongozi wa G20 kwa kaimu balozi wa Marekani nchini humo, kwani inaona ni kama kudharau protokali za kidiplomasia.