Mauaji hayo ya hivi karibuni kabisa yanaifanya idadi ya Wapalestina waliokwishauawa kwenye Ukanda wa Gaza tangu Israel ianze mashambulizi yake baada ya uvamizi wa wanamgambo wa Kipalestina mnamo Oktoba 7, 2023, kufikia 69,546 na majeruhi 170,833, kwa mujibu wa Wizara ya Afya ya Ukanda huo.
Wizara hiyo pia ilisema tangu kuanza kwa kile kiitwacho usitishaji wa mapigano mnamo Oktoba 10 mwaka kuu, Wapalestina 312 wameshauawa na wengine 760 kujeruhiwa kwenye mashambulizi yanayoendelea kufanywa na Israel mara kwa mara kwa madai ya kuwaandama wanamgambo wa Kipalestina.
Hayo yakijiri, wavulana wawili waliouawa na wanajeshi wa Israel karibu na Ramallah huko kwenye Ukingo wa Magharibi unaokaliwa kimabavu wamezikwa leo baada ya Sala ya Ijumaa.
Wavulana hao, Sami Ibrahim Mashaikha, mwenye umri wa miaka 16, na Amr Khaled Al-Marboua, mwenye umri wa miaka 18, walipigwa risasi usiku wa kuamkia leo wakati vikosi vya Israel vikiendelea na msako wao kwenye kiunga cha Kfar Aqab.
Odai Al-Shurfa, rafiki wa Amr, aliyeshuhudia mauaji ya rafiki yake, alisema walikuwa wamesimama mbali kuangalia operesheni ya jeshi la Israel.
“Amr alikuwa amesimama na rafiki yetu mmoja. Kulikuwa na mdunguaji wa wavamizi amejitegesha kwenye jengo moja. Amr alikuwa amesimama tu, hakuwa na chochote wala harushi mawe, amesimama tu kama wengine. Yule mdunguwaji akampiga risasi kifuani na akafa hapo hapo. Mvulana aliyekuwa naye alipigwa risasi mbili mkononi.” Alisema Odai.
“Waliuawa bure”
Umm Samer, ambaye ni mmoja wa wanafamilia wa Sami, alisema kuwa mauaji hayo yalifanyika wakati wavulana hao wakiwa wamekaa pamoja na hawakuwa na harakati yoyote.
“Hatujuwi mdunguwaji alitokea wapi. Sami alikuwa na wenzake wengine na mmoja wao pia aliuawa, mwengine amejeruhiwa vibaya, na mwengine mkono wake umejeruhiwa vibaya, lakini amekataa kufanyiwa upasuaji kwa kuwa anataka kuhudhuria maziko ya rafiki yake kwanza. Ukatili gani huu. Tumekaa tu nyumbani na ghafla mtoto wetu anauawa. Kwa haki gani? Kwa sheria gani. Tumevunja sheria gani?” Alisema mama huyo.
Lilipotakiwa kutolea maelezo mauaji hayo, jeshi la Israel lilitaka waulizwe polisi wake wa mpakani, ambao nao hakujibu haraka ombi la kutoa maoni yao.
Ingawa kile kiitwacho makubaliano ya kusitisha mapigano kimezuwia vita vya moja kwa moja kati ya Israel na wanamgambo wa Kipalestina, lakini jeshi la Israel limekuwa mara kwa mara likifanya mashambulizi kwenye Ukanda wa Gaza, huku Ukingo wa Magharibi ukishuhudia ongezeko la machafuko na mauaji.
Wapalestina wamekuwa wakikabiliwa na hatua kali kabisa za kijeshi ndani ya kipindi cha miaka miwili sasa, ambao uhuru wao wa kutembea umebanwa, na mashambulizi yanayofanywa na walowezi wa Kiisraeli dhidi yao yameongezeka.