Katibu Mkuu wa Umoja wa Mataifa António Guterres ametoa wito wa kuwepo uungaji mkono mpya kimataifa kwa watu wa Palestina na haki yao ya kujitawala, akisema, mateso ya Palestina yamefikia “viwango ambavyo havijawahi kushuhudiwa” katika kipindi cha miaka miwili iliyopita.
Katika taarifa yake ya kuadhimisha Siku ya Kimataifa ya Mshikamano na Watu wa Palestina, inayoadhimishwa kila mwaka tarehe 29 Novemba, Guterres amesema maadhimisho hayo yanakuja baada ya “miaka miwili ya mateso makubwa na miito ya kila mara ya usitishaji vita” katika Ukanda wa Ghaza, akimaanisha mauaji ya kimbari ya Wapalestina yaliyofanywa na utawala wa kizayuni wa Israel.
Katibu Mkuu wa Umoja wa Mataifa amesema, Wapalestina walionusurika kutokana na vita huko Ghaza “wanaomboleza kupotea kwa makumi ya maelfu ya marafiki na wanafamilia – karibu theluthi moja kati yao wakiwa ni watoto,” huku wakikabiliwa na njaa iliyoenea, magonjwa, kiwewe cha kisaikolojia, na uharibifu wa nyumba, maskuli, na mahospitali.
Aidha, Guterres amelaani vitendo vinavyoendelea kufanywa na utawala wa kizayuni wa Israel katika Ukingo wa Magharibi unaoukalia kwa mabavu, ikiwa ni pamoja na Baitul Muqaddas Mashariki, akizitaja harakati za kijeshi zinazoendeshwa na utawala huo, machafuko yanayofanywa na walowezi, upanuzi haramu wa vitongoji, kufukuzwa Wapalestina, ubomoaji wa nyumba zao, na vitisho vya kunyakuliwa ardhi zao.
Katibu Mkuu wa UN amewapa heshima na kuwaenzi mamia ya wafanyakazi wa utoaji huduma za kibinadamu wa Kipalestina waliouawa wakati wa vita vya Ghaza, wengi wao wakiwa wafanyakazi wa Umoja wa Mataifa, akivielezea vifo vyao kuwa ni “upotevu mkubwa zaidi wa wafanyakazi katika historia ya shirika hilo.”
Guterres ametilia mkazo pia ahadi ya Umoja wa Mataifa ya kutaka kuwepo na amani ya haki na ya kudumu inayotegemea sheria ya kimataifa na suluhisho la mataifa mawili, akiihimiza jamii ya kimataifa isimame kidete nyuma ya watu wa Palestina katika harakati zao za kupigania uhuru, utu, na utaifa…/