Shirika la Madaktari Wasio na Mipaka limetangaza kuwa, utawala ghasibu wa Israel umewauwa shahidi Wapalestina zaidi ya 300 katika Ukanda wa Gaza tangu kufikiwa kwa usitishaji vita katika Ukanda huo.
Taarifa iliyotolewa na Shirika la Madaktari Wasio na Mipaka imelaani mauaji yaliyosababishwa na mashambulizi ya anga ya utawala ghasibu wa Israel huko Gaza na kutoa wito wa kulindwa mara moja raia wote, wahudumu wa afya na vituo vya matibabu.
Kwa mujibu wa Ofisi ya Vyombo vya Habari vya Mamlaka ya Palestina katika Ukanda wa Gaza, vikosi vamizi vya Israel vimefanya ukiukaji mara 393 wa usitishaji mapigano huko Gaza tangu kutekelezwa kwa makubaliano ya kusitisha mapigano Oktoba 11 hadi Novemba 19.
Wimbi la hivi majuzi la mashambulio ya Israel dhidi ya Gaza, yaliyoanza siku mbili zilizopita, yalisababisha kuuawa shahidi kwa takriban watu 28.
Shirika la Madaktari Wasio na Mipaka pia lilibainisha kuwa, timu zake zimeanza kuwatibu wanawake na watoto wanaougua mivunjiko na majeraha ya risasi kwenye mikono, miguu na vichwa vyao tangu Jumatano.
Wakati huo huo, Kamishna Mkuu wa Shirika la Umoja wa Mataifa la Kuhusumia Wakimbizi wa Kipalestina (UNRWA) amesema kwamba, usitishaji mapigano haujawa na athari yoyote katika kuboresha hali ya watu wa Gaza, na kwamba mateso makubwa ya binadamu katika ukanda huo yanaendelea na misaada inayoingizwa ni midogo sana hasa wakati huu wa kuwadia msimu wa baridi kali.