Jeshi la Sudan limekabiliana vikali mapiganoni dhidi ya wanamgambo wa Kikosi cha Msaada wa Haraka (RSF) katika medani tofauti za vita huko Kordofan ya Kaskazini na Magharibi huku makumi ya maelfu ya raia wakiendelea kukimbia machafuko na mapigano yanayoshtadi kila uchao.
Televisheni ya al Jazira yenye makao yake mjini Doha Qatar imeripoti kuwa mapigano kati ya jeshi la Sudan na wanamgambo wa RSF yamejiri leo magharibi mwa mji wa El-Obeid ambao ni makao makuu ya jimbo la Kordofan ya Kaskazini, huko Babnousa mji muhimu unaopatikana huko Kordofan ya magharibi na katika miji mingine kadhaa ya kaskazini huko Kordofan.
Duru za kijeshi zimeiambia televisheni ya al Jazira kwamba wapiganaji wa RSF wametumia droni na makombora kushambulia kambi za jeshi la Sudan katika mji wa Babnousa.
Muawia Mohamed, mkuu wa operesheni za dharura katika Tume ya Misaada ya Kibinadamu katika Jimbo la White Nile, amesema kuwa rneo hilo hivi karibuni limepokea zaidi ya raia 16,000 waliokimbia makazi yao huko Kordofan Kaskazini na katika jimbo la Darfur.
Ameongeza kuwa, jimbo la White Nile limetoa hifadhi kwa wakimbizi zaidi ya milioni mbili huku idadi hiyo ikizii kuongezeka kufuatia kushtadi mapigano.
Sheldon Yett, Mwakilishi wa Mfuko wa Kuhudumia Watoto wa Umoja wa Mataifa (UNICEF) nchini Sudan, amesema kuwa suhula za kutosha za kukidhi mahitaji ya wale wanaokimbia kutoka katikamji wa El-Fasher, makao makuu ya jimbo la Kaskazini la Darfur, ambalo lilitekwa na kikosi cha RSF mwezi uliopita.
Amesema, watoto wengi wameshuhudia jinai zikifanywa dhidi ya familia zao huko El Fasher na katika maeneo yanayouzunguka mji huo.