Chanzo cha picha, Reuters
Waziri wa mambo ya nje wa Marekani Marco Rubio amesema kuwa mpango uliopendekezwa wa kumaliza vita nchini Ukraine, unaoonekana kupendelea Urusi baada ya maelezo yake kutolewa, “uliandikwa na Marekani”.
Maoni hayo yalitolewa baada ya kundi la maseneta wa Marekani kusema kuwa Bw Rubio aliwaambia kwamba rasimu hiyo haiakisi msimamo wa Washington, huku seneta mmoja akieleza kuwa ni orodha ya matamanio ya Urusi.
Mapema Jumamosi, viongozi wa Ulaya, Canada na Japan walisema mpango huo una “mambo muhimu kwa amani ya haki na ya kudumu” lakini “unahitaji kazi ya ziada,” wakielezea wasiwasi juu ya mabadiliko ya mpaka na vikwazo kwa jeshi la Ukraine.
Leo, Jumapili, Novemba 23, maafisa wa usalama kutoka Uingereza, Ufaransa, Ujerumani, Marekani na Ukraine wameratibiwa kukutana Geneva, Uswisi.
Rais wa Ukraine Volodymyr Zelenskyy hapo awali alionya kwamba, kutokana na shinikizo kutoka kwa Marekani, Ukraine inakabiliwa na “moja ya nyakati ngumu zaidi katika historia yake” kukubali mpango unaoonekana kuipendelea Moscow.
Chanzo cha picha, Reuters