Kwa nini wanawake hawawaoneshi wapenzi wao kwenye mtandao?

Wafuasi zaidi ya 33,000 wa Tawana Musaburi kwenye ukurasa wake wa Instagram wanaweza kudhani kuwa wanajua kila kitu kuhusu maisha yake, lakini wengi wao hawajaona uso wake.

Kuna ishara za hapa na pale kwamba mpenzi wa kiume yupo, kama picha iliyopigwa kutoka nyuma au glasi mbili za divai wakati wa chakula cha jioni, lakini msichana huyo wa miaka 24 hana nia ya kuweka picha ya uso wake kwenye mitandao ya kijamii.

“Mimi hufuata tu sheria za wasichana ambazo hazijaandikwa popote,” anasema Tawana. “Kwamba kama mwanamke, unataka kuonekana mwenye nguvu na mtu huru, yaani, mtu ‘ninayesimamia mambo yangu mwenyewe.’

Tawana ameunda taswira ya mtu ambayo haihusishi mpenzi. “Sitaki taswira hiyp ionekane kama ilipatikana kwa msaada kutoka kwa mwanaume,” anasema. “Inanipa furaha zaidi kusema, ‘Nilifaulu mwenyewe.’

Anasema, hata kama uhusiano wao unazidi kuwa mzuri haitabadilisha msimamo wake: “Hata kama atanivalisha pete, bado haitoshi kwangu kuonyesha uhusiano wangu hadharani.”

Tawana sio mwanamke pekee ambaye anasita “kufichua rasmi” uhusiano wake kwenye mitandao ya kijamii, na watumiaji wa mitandao ya kijamii wamegundua hili.

Jarida la Vogue la Uingereza lilichapisha taarifa yenye kichwa “Je, ni aibu kuwa na mpenzi?”, ambayo ilisababisha gumzo na maudhui kwenye TikTok na Instagram yanayouliza swali hilo hilo moja.

Katika taarifa iliyosomwa na watu wengi, mwandishi Shante Joseph anasema kumekuwa na mabadiliko katika jinsi mahusiano ya wanawake yanavyoonyeshwa mtandaoni. Anaandika kwamba wanawake wanataka “kufurahia manufaa ya kijamii ya kuwa na mpenzi wa kiumei bila kuonekana kuwa na “mpenzi wa kiume.”

Shante Joseph anaandika kwamba kuchapisha picha za mpenzi wako mara kwa mara kunaweza kuonekana kama kitu “kisichofaa” hasa katika dunia ya sasa.

Anaamini kwamba kuwa na mpenzi hakuchukuliwi tena kuwa “mafanikio” na, tofauti na zamani, sio kipimo cha kuwa mwanamke au kufanikiwa kama mwanamke.

Anaamini kuwa wanawake wanasita kuweka picha za wapenzi wao kwa sababu “tunaishi katika mfumo dume ambao unaweka shinikizo kwa wanawake.”

“Wanawake wengi wanasema ni vizuri kuwa na mpenzi au kuwa na mume,” Shante Joseph aliambia BBC. “Lakini huenda hilo si kweli. Tunahitaji kuchunguza upya uhusiano wetu na wanaume katika nafasi hii.”

Stephanie Yeboah, mtengeneza maudhui na mwandishi kutoka London Kusini, aliiambia Vogue ya Uingereza kwamba anajuta kuweka picha za mpenzi wake kwenye Instagram.

Aliambia BBC kwamba alipoweka picha ya mpenzi wake kwa mara ya kwanza, alipokea “jumbe nyingi za faragha” kutoka kwa watu wakisema hawataendelea kumfuata tena baada ya picha hizo kutumwa kwasababu hawakuweza tena kuelewa au kupenda maudhui yake.

“Nadhani nilipoteza takriban wafuasi elfu moja siku hiyo,” Bi Yeboa anasema.

Ingawa anasema anaelewa ni kwa nini watu wengine hawapendi maudhui ya kimapenzi.

Aliongeza: “Maudhui mengi yenye mwelekeo wa uhusiano ni ya kawaida na ya hisia, na mara nyingi watu huhisi aibu au kuchukizwa wanapoiona.”

Kwa watu wanaotumia mitandao ya kijamii kama kipato, kukosa kuweka picha au habari za mpenzi mpya kunadumisha usawa na mwendelezo katika maudhui na mtindo wao wa kazi, anasema Prof. Gillian Brookes kutoka Chuo cha King’s College London.

“Wanauza mada fulani yenye urembo na ladha maalum,” anaeleza. “Pia wana wafuasi waaminifu, kwa hivyo wakiondoka kwenye mtindo huo, watawachanganya wafuasi wao na, kwa sababu hiyo, kupoteza baadhi yao.”

Lakini sio watengeneza maudhui tu ambao hawataki kupost picha za wapenzi wao.

Milly amechumbiwa na mpenzi wake wa karibu miaka mitano, lakini msichana huyo mwenye umri wa miaka 25 anasema anasita kumweka mchumba wake kwenye mitandao ya kijamii.

“Sitaki kuonekana kama mtu anayetegemea mpenzi wangu, au kwamba uhusiano wetu ndio kila kitu kunihusu,” anaeleza.

“Mitandao ya kijamii inaunda picha finyu sana ya mtu,” anaongeza. “Kama ni picha na hadithi tu zangu na mpenzi wangu, inajenga taswira kwamba namkwamilia mpenzi wangu.”

Charlotte amekuwa na mpenzi kwa miaka miwili. Msichana huyo mwenye umri wa miaka 20 anasema ameamua kutoweka picha za mpenzi wake kwenye mitandao ya kijamii kwa sababu kadhaa.

Katika upande wa urembo, anasema hawana picha nyingi za pamoja ambazo angeziona kama nzuri kwa ajili ya Instagram.

Lakini zaidi ya haya, anaamini uhusiano unapaswa kuwa “wa siri zaidi kuliko urafiki”.

Anaendelea: “Pia ninahisi kama ningechapisha uhusiano wangu, itakuwa kusema, ‘Niangalie mimi na uhusiano wangu ulio kamili’, ambao, kwa bahati mbaya, hauko hivyo.”

Athera, sio jina lake haswa, pia anapendelea faragha. Msichana huyo mwenye umri wa miaka 21 anasema marafiki zake wengi wana mtazamo sawa na pia anataja “jicho ovu” kama sababu ya kutowaweka wapenzi wao mitandaoni.

“Jicho ovu” ni imani kwamba kuna laana inayopitishwa kupitia kuangalia mtu kwa jicho mbaya, ambayo kawaida huchochewa na wivu.

“Singempost ili kuzuia mtu kuleta wivu wake hata kama ni bila ya kukusudia na fahamu, kwenye uhusiano wangu,” anasema Athera.

Dkt. Gwendolyn Seidman, mwanasaikolojia katika Chuo Kikuu cha Michigan, huchunguza jinsi watu wanavyowasiliana mtandaoni – kwa kuzingatia hasa mahusiano ya kimapenzi.

Kutoa maelezo ya kibinafsi ya maisha yako mtandaoni wakati mwingine inaweza kuja na hofu au wasiwasi – jambo ambalo Seidman anaamini linatokana na hofu ya suala hilo kudumu mtandaoni kwa muda mrefu au milele.

“Watu hawachapishi vitu vingi mtandaoni [sasa],” Dkt. Seidman asema, “na sababu yake ni kwamba watu wanatambua kuwa mambo haya yanaweza kukaa hapo milele.

“Hauwezi kuYAondoa na hivyo unataka kuwa mwangalifu zaidi kuhusu ni nini unaweka hapo.”