Nani wa kuizuia Arsenal msimu huu?

Imekuwa wikendi nyingine kubwa kwa Arsenal.

Siku mbili baada ya sare ya kustaajabisha ya The Gunners dhidi ya Sunderland kuwapa wapinzani wao wa Ligi Kuu matumaini mapya, ushindi wa Jumapili dhidi ya Tottenham umewarudisha kwenye kilele.

Eberechi Eze, aliyelengwa na Spurs majira ya kiangazi, ndiye alikuwa shujaa, akifunga hat-trick yake ya kwanza katika soka ya wakubwa na ya kwanza katika derby ya kaskazini mwa London tangu 1978 Arsenal ilipoizaba Tottenham 4-1 katika mechi iliotawala pakubwa ..

Siku moja baada ya mabingwa watetezi Liverpool kupoteza mechi yake ya sita kati ya saba na Manchester City kuchapwa na Newcastle, vijana wa Mikel Arteta hawakuwa na matatizo kama hayo wakisonga mbele kwa pointi sita zaidi ya Chelsea walio nafasi ya pili.

Hii ilionekana kama kauli ya ushindi kwa Arsenal dhidi ya wapinzani wao wakubwa – ambao walicheza mechi hii wakiwa hawajafungwa ugenini msimu mzima – huku nyota wa Arsenal kama vile Gabriel, Martin Odegaard, Kai Havertz na Viktor Gyokores wakiwa kwenye orodha ya majeruhi ..

Baada ya kufungwa kutoka mbali na Richarlison bao la pekee lililowafariji wageni hao, kulikuwa na mshindi mmoja tu katika mchezo wa upande mmoja wa London derby ya kaskazini.

Arsenal walikuwa na mashuti 17 ikilinganishwa na matatu ya Tottenham, huku wageni wakimalizia kwa mabao ya kiwango cha (xG) 0.07 pekee.

“Huu ni wazimu. Siku maalum, jamani. Siku maalum kwangu, familia yangu,” Eze aliambia BBC Match of the Day.

“Sidhani kama ningeweza kufikiria kufanya hivi. Hii ni maalum zaidi. Naweza tu kumshukuru Mungu.

“Tulikuwa tayari kwa mpangilio wowote ambao walikuwa wanakuja nao kwa sababu ya bidii ya timu yetu ya kiufundi. Sifa kubwa kwao, na bila shaka wachezaji katika timu yetu – uwezo, talanta. Kwa pembe yoyote, tunatishia kufunga mabao.

“Pengine ningefunga mabao manne. Kila mara najaribu kufunga, kila mara nikijaribu kutumia fursa zangu. Ni muhimu kutochoka.”

Ilikuwa siku bora zaidi kwa mchezaji wa Arsenal Eze.

Baada ya kuachiwa na The Gunners akiwa na umri wa miaka 13, Eze alikataliwa na Fulham, Reading na Millwall, kabla ya kupata nafasi ya kujiunga na QPR.

Ujumbe wa X wakai huo Twitter aliouchapisha Aprili 2015 umeibuka tena kwenye mitandao ya kijamii, ukisema: “Naapa kwamba nitafanya hivyo na nitakapofanya, wataonyesha ujumbe huu”.

Mchezaji huyo wa kimataifa wa Uingereza sasa amefaulu.

Kabla ya mechi meneja wa Tottenham Thomas Frank alitania “nani?” alipoulizwa kuhusu Eze alikuwa karibu kiasi gani kuwa mchezaji wa Spurs majira ya joto. Maneno yale yalimrudia tena.

Hat-trick ya kwanza akichezea timu kubwa inatosha, ikiwa ya kwanza kwenye debi ya London kaskazini katika historia ya Premier League.

Eze alijiunga na Arsenal kwa mkataba wa thamani ya £67m na anaanza kujiimarisha kama mojawapo ya majina ya kwanza kwenye orodha ya timu ya meneja Mikel Arteta.

Aliposajiliwa na The Gunners kulikuwa na maswali mengi kuhusu ni wapi angefaa kwenye kikosi lakini, baada ya kuumia kwa nahodha Odegaard, Eze alichukua nafasi yake kwa mikono miwili.

Mchezaji huyo mwenye umri wa miaka 27 amechukua muda kutulia kwani alizoea majukumu tofauti katika timu hii ya Arsenal kuliko yale aliyozoea akiwa Crystal Palace, lakini tayari ameanza kufanya mambo makubwa.

Alitoa pasi nzuri kwa bao la dakika za lala salama la Gabriel Martinelli dhidi ya City, akafunga bao la ushindi dhidi ya Palace na sasa ana hat-trick ya kwanza dhidi ya wapinzani wakubwa wa The Gunners.

Kutotabirika kwake kunaongeza makali mengine katika safu ya mbele ya Arsenal.

The Gunners wana mechi nyengine mbili zinzokuja, mechi dhidi ya Bayern Munich na Chelsea, lakini Eze atafurahia changamoto kutokana na kiwango alichofikia hivi sasa.

“Yuko hivyo. Alikuwa na siku mbili za mapumziko baada ya kambi ya timu ya Uingereza na baada ya siku ya kwanza alitaka kufanya mazoezi,” Arteta alisema.

“Alitaka kurudi na kuboresha na kuuliza maswali. Unapokuwa na kipaji kama hiki na akili kama hiyo na kisha kuongeza nia ya kuwa bora na kufanya mazoezi, mambo haya hutokea.

“Nilipozungumza na Thomas Tuchel [kuhusu Eze] nilimuuliza ‘ni mzuri kiasi gani?’ Aliniambia ‘mmoja wa wachezaji bora zaidi niliowaona’ ninamkadiria kuwa mmoja wa wachezaji bora zaidi katika suala la talanta ikiwa tutaongeza kiwango chake cha kazi, nia ya kuichezea timu hii na furaha ninayopata anapokuwa kwenye kambi, ni mchezaji maalum.

Hakuna mchezaji wa Kiingereza ambaye amehusika katika mabao zaidi ya Eze mwaka 2025 kwenye Ligi ya Premia. Ni Erling Haaland (25), Mohamed Salah (23), Bryan Mbeumo (21) na Antoine Semenyo (18) pekee ndio wamehusika kwenye mabao mengi ya ligi ya juu kuliko nambari 10 wa Arsenal mwenye (mabao 18 – 10, asisti nane).

“Ninajua jinsi uhamisho huu kutoka kwa Crystal Palace ulikuwa na maana kwake na uchezaji mzuri kutoka kwake. Mchezaji bora zaidi uwanjani,” fowadi wa zamani wa Crystal Palace Clinton Morrison aliambia BBC Radio 5 Live.

“Hapa ndipo maisha yake ya Arsenal yanaanza.”

Ndio, bado kuna mechi 26 za kucheza kwa kila timu msimu huu.

Kwa hivyo uongozi wa pointi sita katika hatua hii kwa hakika ni mbali na hauwezi kufkiria? Sawa, lakini takwimu zinaonyesha uongozi wa Arsenal ni muhimu sana.

Hii ni mara ya tano kwa Arsenal kuwa kileleni mwa Ligi ya Premia baada ya mechi 12 lakini – mashabiki wa Gunners – wameshindwa kuendelea na kutwaa ubingwa mara tatu zilizopita wakiwa wameongoza katika hatua hii.

Hatahivyo, huu ndio uongozi mkubwa zaidi ambao wamekuwa nao katika hatua hii ya kampeni ya Ligi Kuu.

Na inakuwa bora zaidi kwa mashabiki wa Arsenal. Hakuna timu iliyoshindwa kutwaa ubingwa ikiwa na pointi sita au zaidi baada ya mechi 12 za msimu mmoja wa Ligi Kuu.

Takwimu hiyo ni ya kupotosha, ingawa, kwa kuwa timu zimetoka nyuma zaidi kushinda taji.

Je, ni mara ngapi timu zimekuwa nyuma ya vinara kwa pointi sita au zaidi baada ya michezo 12 na bado kutawazwa mabingwa?

Bado inaonekana kuwa nafasi nzuri kwa Arsenal, jibu likiwa mara tano pekee – la hivi punde zaidi likiwa 2013-14 wakati City wakiwa walipokuwa nyuma ya Arsenal kwa pointi sita.

Chelsea inabidi wachukuliwe kuwa wapinzani wa taji sasa wamekaa nafasi ya pili.

Wameshinda mechi tano kati ya sita zilizopita za ligi, wakishinda tatu mfululizo bila kufungwa kwa mara ya kwanza tangu 2022.

Aston Villa na Palace, pointi mbili na tatu nyuma ya Chelsea mtawalia, pia wanajiona kuwa wapinzani.

Huku Liverpool sasa wakiwa nyuma kwa pointi 11 nyuma ya Arsenal, vijana wa Arne Slot wangelazimika kufanya kitu ambacho hakuna timu iliyofanya katika historia ya Ligi Kuu ya Uingereza ili kurejea na kushinda taji.

Ni timu mbili pekee ndizo zimerejea kutoka katika upungufu wa pointi saba wa sasa wa City na kushinda ligi.

Mashabiki wa Arsenal walikuwa na wasiwasi kwenda kwenye derby ya London kaskazini bila beki wao bora wa kati, Gabriel.

Mbrazil huyo amekuwa katika safu ya ulinzi ya Arsenal kwa nguvu ya ajabu msimu huu, akiongoza kwa kuondoa hatari za angani na kushika nafasi ya pili kwa idadi kubwa ya kuondoa hatari langoni.

Msimu uliopita Arsenal ilishinda mechi nne pekee kati ya 12 za ligi wakati Gabriel na William Saliba hawakuanza pamoja.

Lakini hii inaonekana kuwa Arsenal tofauti baada ya majira ya joto walipotumia £250m na ​​kuleta wachezaji wanane ili kuongeza ubora na kina kwenye kikosi chao.

kuongeza kikosi cha wachezaji wenye ubora.

Beki huyo amejiunga kwa mkopo kutoka Bayer Leverkusen, akiwa na chaguo la pauni milioni 52 kufanya mkataba huo kuwa wa kudumu, na ni kipenzi cha Arteta ambaye alimwita “shujaa”.

Hincapie ni mshindi wa Bundesliga na pia anaweza kucheza katika nafasi ya beki wa kushoto, akitoa chaguo za Arteta huku akihakikisha hakuna kushuka kwa ubora ikiwa Saliba au Gabriel hawapatikani.