Msemaji wa Wizara ya Mambo ya Nje ya Iran amelaani azimio lililopitishwa na Wakala wa Kimataifa wa Nishati ya Atomiki (IAEA) kuhusu mpango wa amani wa nyuklia wa Tehran na kulitaja kuwa “doa la fedheha” kwa wafadhili wa azimio hilo.
Ismail Baqaei ameeleza haya siku mbili baada ya Bodi ya Magavana ya IAEA kupitisha kwa kura chache azimio dhidi ya Iran lililopendekezwa na Ufaransa, Uingereza, Ujerumani na Marekani.
Amesema, hakukuwa na nia njema nyuma ya azimio hilo, ambalo linaifanya kadhia ya yuklia ya Iran kuwa ngumu zaidi, badala ya kusaidia kukupatikana utatuzi.
“Kwa maoni yangu, yaliyomo ndani ya azimio hilo ni doa la fedheha kwa wale wote waliolitayarisha,” amesema msemaji wa Wizara ya Mambo ya Nje ya Iran.
Baqaei ameongeza kuwa, azimo hilo sio tu linakiuka kanuni za Baraza la Usalama la Umoja wa Mataifa na desturi za hapo awali za wakala wa IAEA, lakini pia limeshindwa hata kuashiria hata kidogo chanzo cha tatizo, yaani jinai zilizofanywa na utawala wa Israel na Marekani katika mashambulizi yao dhidi ya vituo vya kuzalisha nishati ya nyuklia vya Iran vinavyoendesha shughuli zake kwa malengo ya kiraia.
Msemaji wa Wizara ya Mambo ya Nje ya Iran amesema: Azimio la IAEA dhidi ya Iran linajumuisha uingiliaji wa wazi katika kazi za wakala huo na litadhoofisha zaidi uhuru wa taasisi hiyo ya kimataifa.
Azimio hilo lililopitishwa na Bodi ya Magavana ya Wakala wa Kimataifa wa Nishati ya Atomiki limeitaka Tehran “bila kuchelewa” kutoa ripoti kuhusu akiba yake ya urani iliyorutubishwa vifaa vilivyoharibiwa katika mashambulizi ya Israel na Marekani mwezi Juni mwaka huu huku likikwepa kutaja ushirikiano wa muda mrefu wa Iran na IAEA.