Wanawake hao waliowakilisha parokia 44 za dayosisi kuu ya Bukavu, walifanya gwaride la amani kupinga unyanyasaji wa kidijitali na unyanyasaji wa kingono unaotumika kama silaha ya vita. Kwa kuwa maandamano ya umma yamepigwa marufuku na watawala wapya wa jiji la Bukavu, gwaride hili liliandaliwa katika kiwanja cha kituo cha Olame, kikiwa mojawapo ya miundo ya dayosisi ya Bukavu. Mikononi mwao walibeba mabango yaliyoandikwa: “Miili ya wanawake si uwanja wa vita” “Bunduki zikiunguruma nje, vurugu hulipuka ndani” na kadhalika.
Baada ya gwaride, wanawake hao walikusanyika kwa kikao cha kutafakari ilikuimarisha juhudi za utetezi wakati wa Siku 16 za Kupinga Ukatili wa Kijinsia. Kwa kauli moja, wanawake washiriki wa Kanisa Katoliki katika Kivu Kusini wanasisitiza kwamba unyanyasaji wa kingono lazima ukomeshwe wakati wa vita, na wakati wa amani.
Kabla ya AFC/M23 kuuteka mji wa Bukavu mnamo Februari, askari wa jeshi la Kongo walikuwa tayari wamehukumiwa kwa ukatili wa kijinsia dhidi ya wanawake katika vijiji kadhaa vya wilaya za Kabare na Kalehe. AFC-M23 walipofika Bukavu, washtakiwa walikimbia, pamoja na majaji na mawakili. Lakini pia baadae visa vya ubakaji vilishuhudiwa licha yakuwa vilitupiliwa mbali na AFC/M23.
Nono Mwavita ni Mtetezi wa haki za wanawake, anasema usalama wa mwanamke bado haujaimarika na anatoa wito kwa pande zote kwenye migogoro kulinda wanawake na watoto.
Mashirika ya kutetea haki za wanawake yanaamini kwamba waathiriwa wa unyanyasaji wa kijinsia wanahitaji si tu msaada wa kiuchumi, lakini pia msaada wa kisaikolojia katika maeneo yaliyoathiriwa na migogoro, hasa katika majimbo ya Ituri, Kivu Kusini na Kivu Kaskazini.