Urusi imefanya mashambulizi makubwa katika mji mkuu wa Ukraine, Kyiv, watu sita wameuawa na majengo ya makazi na miundombinu ya nishati imeharibiwa. Ukraine nayo imejibu kwa mashambulizi ya droni kusini mwa Urusi, ambapo watu watatu wameuawa na wengine kadhaa wamejeruhiwa katika eneo la Rostov.
Urusi ilirusha makombora 22 na zaidi ya droni 460 kuilenga Ukraine, mashambulizi hayo yamesababisha kukatika huduma za maji na umeme huku joto likiongezeka katika baadhi ya maeneo ya Kyiv. Moto mkubwa ulizuka katika jengo la ghorofa tisa katika wilaya ya Dniprovskyi ambako watu wawili wamekufa na wengine watano wamejeruhiwa. Wakati huo huo kwenye shambulio jingine, jengo la makazi limeshambuliwa katika wilaya ya Pecherskyi.
Kwingineko watu wanne wameuawa baada ya jengo lisilo la makazi kupigwa katika wilaya ya Sviatoshynyi na nchi jirani za Romania na Moldova zimeripoti uvamizi wa droni katika anga zao.
Wizara ya Nishati ya Ukraine imethibitisha mashambulizi kwenye miundombinu muhimu, huku idara za huduma za dharura zikisema watu kadhaa wamejeruhiwa katika eneo la Odesa katika mashambulizi kwenye miundombinu ya nishati na bandari. Kwa upande wake, Urusi imedai kuharibu droni 249 za Ukraine usiku wa kuamkia leo, zikiwemo droni 116 kwenye anga ya Bahari Nyeusi.
Marekani yaongeza juhudi kumaliza Vita
Mashambulizi haya yametokea wakati Marekani ikiongeza juhudi za kuvimaliza vita vya miaka minne. Naibu Waziri anayehusika na maswala ya kijeshi nchini Marekani, Dan Driscoll, amekutana na maafisa wa Urusi mjini Abu Dhabi kwa mazungumzo ya muda mrefu, hayo ni wa mujibu wa afisa wa Marekani aliyezungumza kwa masharti ya kutotajwa jina.
Driscoll, aliyejiunga na timu ya majadiliano wiki mbili zilizopita, anaongoza awamu mpya ya mazungumzo kuhusu masharti ya makubaliano ya amani. Rais wa Ukraine, Volodymyr Zelenskyy, amesema, kuna matumaini baada ya mazungumzo ya Jumapili kati ya Marekani na Ukraine huko Geneva. Zelenskyy anatarajia kujadili masuala nyeti na Rais Donald Trump, huku mshauri wake Rustem Umerov akieleza kuwa wanatarajia kukamilisha makubaliano mwishoni mwa mwezi Novemba.
Hayo yakiwa yanaendelea Waziri Mkuu wa Uingereza, Keir Starmer, pia ameeleza kuwa safari bado ni ndefu na ngumu katika kuhakikisha amani ya kudumu ya nchini Ukraine. Akizungumza bungeni leo Starmer amesema wanaendelea kuusukuma mchakato huu.
“Na, Mheshimiwa Spika, tunadhihirisha kuhusu misingi ya kimsingi kwamba uhuru wa Ukraine lazima udumishwe, kwamba Ukraine iweze kujilinda siku zijazo, na kwamba masuala kuhusu Ukraine na mustakabali wake lazima yaamuliwe na Ukraine.Tuko wazi kwamba sauti yao lazima iwe daima kiini cha mchakato, na vipengele vinavyohusiana na Ulaya na NATO vitahitaji ridhaa ya wanachama wa Ulaya na NATO”
Wakati huo huo, Bunge la Ulaya limeidhinisha mpango wa euro bilioni 1.5 kwa ajili ya kuimarisha ushirikiano wa sekta ya ulinzi ya umoja huo na Ukraine. Euro milioni 300 zimetengwa kwa ajili ya chombo cha msaada kwa Ukraine. Mpango huu unalenga kujenga sekta ya kisasa ya viwanda vya kijeshi barani Ulaya kwa kushirikiana na Ukraine.
Halmashauri ya Ulaya inakadiria kuwa takribani euro trilioni 3.4 zitatumika kwa ulinzi katika muongo ujao na inapanga kuongeza bajeti ya muda mrefu ya EU kwa ulinzi na anga ambapo zinaweka kufikia hadi euro bilioni 131. Nchi wanachama zinahimizwa kununua vifaa vya kijeshi ndani ya umoja huo na kushirikiana na wasambazaji wa Ulaya ili kupunguza gharama.