Starmer aliongoza mazungumzo na viongozi wa kile kinachoitwa muungano wa walio tayari jana Jumanne baada ya mazungumzo kati ya Ukraine na Marekani huko Geneva mwishoni mwa wiki ambayo yalionekana kufungua njia ya kupatikana amani nchini Ukraine.
Akihutubia mkutano huo uliofanyika kwa njia ya mtandao kutokea Chumba cha Baraza la Mawaziri katika ofisi zake zilizoko Mtaa wa Downing,Starmer alipongeza na kuikaribisha hatua kubwa iliyopigwa kwenye mazungumzo hayo ya Geneva.
Amesema mazungumzo hayo yalikuwa ni fursa ya kuhakikisha kwamba rasimu ya mpango huo inaakisi kikamilifu maslahi ya Ukraine na inaweka msingi wa amani ya kudumu.” Aliongeza kuwa Ukraine “imependekeza mabadiliko kadhaa ya kujenga,” ambayo yaliungwa mkono na washauri wa usalama wa taifa barani Ulaya.
Na huko Washington Rais Donald Trump alisema Jumanne kwamba mpango wake wa kuvimaliza vita nchini Ukraine “umerekebishwa” na atamtuma mjumbe wake Steve Witkoff kukutana na Rais wa Urusi Vladimir Putin na Waziri wa Majeshi Dan Driscoll kukutana na maafisa wa Ukraine.
Akapendekeza kuwa katika siku za usoni huenda atakutana na Putin na Rais wa Ukraine Volodymyr Zelenskyy, ingawa alitahadharisha kwamba hatafanya hivyo kama hakutakuwa na hatua zilizofikiwa kwenye mazungumzo.
Akaongeza kuwa watakuwa wakiarifiwa, sambamba na Makamu wake JD Vance, Waziri wa Mambo ya Nje Marco Rubio, Waziri wa Ulinzi, Pete Hegseth na Mkuu wa utumishi kwenye Ikulu ya White House Susie Wiles. Kupitia mtandao wake wa Truth Social, Trump amesema, bado kuna mambo machache yaliyosalia ambayo bado yanatafutiwa suluhu.
Mjumbe wa rais wa Marekani Witkoff atakutana na Rais wa Urusi Vladimir Putin mjini Moscow wiki ijayo na huenda akaungana na mkwewe Donald Trump Jared Kushner, hii ikiwa ni kulingana na rais Trump jana Jumanne alipozungumza na waandishi wa habari akiwa kwenye ndege yake ya Air Force One.
Kituo cha utangazaji cha Bloomberg, kilichapisha taarifa jana Jumanne kwamba Witkoff alimshauri afisa mmoja wa ngazi za juu wa ikulu ya Kremlin Yuri Ushakov, katikati ya mwezi Oktoba ambaye ni mshauri wa sera za kigeni wa Putin kuhusu namna Rais Vladimir Putin anavyopaswa kuwasilisha makubaliano ya amani ya Ukraine kwa RaisTrump.
Kwenye mazungumzo hayo, Witkoff pia alipendekeza kuandaliwa kwa mpango wa amani wa vipengele 20 kwa ajili ya Ukraine sawasawa na kile kilichofanyika Gaza, na kumsihi Putin azungumze na Trump.
Huku hayo yakiendelea, Rais Volodymyr Zelensky wa Ukraine amesema katika hotuba yake ya video Jumanne jioni kwamba wameziwekea vikwazo zaidi ya meli 50 za Urusi zinazosafirisha nafaka kutoka maeneo yaliyokaliwa. Amesema huo ni mwelekeo mpya wa vikwazo vya taifa hilo, na kuongeza kuwa baadhi ya meli hizo tayari zimewekewa vikwazo na washirika wa Ukraine, huku akiahidi kuendeleza shinikizo hilo.
Meli hizo zimepigwa marufuku kuingia bandari za Ukraine, na biashara yoyote inayotumia meli hizo za mizigo imepigwa marufuku. Meli nyingi zinaripotiwa kusafiri zikiwa na bendera ya Urusi, huku nyingine zikiwa na bendera ya Panama au nchi nyingine