Urusi imesema imeiona nakala ya hivi karibuni ya rasimu ya mpango wa Marekani wa kukomesha vita vya Ukraine na imesema kwamba baadhi ya vipengele vilivyorekebishwa ni chanya, lakini inataka majadiliano kuhusu sehemu zingine za mpango huo mpya uliorekebishwa.
Naibu Waziri wa Mambo ya Nje wa Urusi Sergei Ryabkov amesema Urusi haitokubali kugaragazwa ili kufikia utatuzi wa mgogoro wa Ukraine.
Ryabkov amesema: “Marekebisho kwenye mpango huu ni sehemu ya mchakato wa mazungumzo. Haitawezekana kufikia makubaliano iwapo sisi tutalazimishwa kuacha nia yetu ya kufikia malengo muhimu tunayokabiliana nayo, ambayo ni pamoja na yale yanayohusu operesheni yetu maalum ya kijeshi. Urusi imesema itasimama imara kulingana na matokeo yoyote na tutachukua hatua ipasavyo kutokana na kinachoendelea sasa kwa kufuata kanuni za msingi zilizowekwa.”
Urusi pia imesema inatarajia mjumbe wa Rais wa Marekani Steve Witkoff atamtembelea Rais wa Urusi Vladimir Putin wiki ijayo kwa majadiliano yanayolenga kuongeza kasi juhudi za kufikia makubaliano ya kuvimaliza vita vya Ukraine vilivyodumu karibu miaka minne.
Hata hivyo, imelaani kuvuja kwa mkanda wa mazungumzo kati ya washauri wakuu wa marais Donald Trump na Vladimir Putin na imesema kwamba hilo ni jaribio lisilokubalika la kuyadhoofisha mazungumzo ya amani ya Ukraine na linachochea vita mseto.
Rais Trump asemaje?
Rais Trump amesema anatazamia kukutana na Putin na Rais wa Ukraine Volodymyr Zelensky hivi karibuni, lakini tu wakati makubaliano ya amani yatakapokamilika au yakiwa katika hatua zake za mwisho.
Rais wa Halmashauri Kuu ya Umoja wa Ulaya Ursula von der Leyen amesema Ulaya itaendelea kuiunga mkono Ukraine na kuishinikiza Urusi hadi “amani ya haki na ya kudumu” ipatikane. Ameutaja mpango uliorekebishwa wa Marekani kuwa ni hatua ya kwanza ya kuvikomesha vita.