Rais wa DRC na mwenzake wa Rwanda wanatarajiwa kusafiri kwenda jijini Washington wiki ijayo kusaini makubaliano ya amani ambapo pia watakutana na Rais Donald Trump wa Marekani, vyanzo vitatu vimeithibitishia Reuters.
Imechapishwa: Imehaririwa:
Dakika 2 Wakati wa kusoma
Matangazo ya kibiashara
Wawili hao wanatarajiwa kukutana wakati huu marekani ikijaribu kufanikisha upatikanaji wa mwafaka wa kumaliza mzozo wa muda mrefu wa mashariki ya Congo, eneo lenye utajiri wa madini.
Vyanzo viwili vya kidiplomasia na Tina Salama, msemaji wa Rais wa Congo Felix Tshisekedi, wameiambia Reuters kwamba mkutano huo utafanyika Disemba tarehe 4.
Akithibitisha kuhusu mpango wa wawili hao kukutana, Tina Salama amesema Rais wa DRC amekuwa akitamana sana ushirikiano wa kikanda ila anasisitiza kuheshimiwa kwa uhuru wa kila nchi suala analosema kwamba halina mjadala.
Msemaji wa Rais wa Rwanda Paul Kagame na mwenzake wa White House hadi tukichapisha taarifa hii hawakuwa wamezungumzia suala hili.
Wiki iliopita, afisa wa White House aliiambia Reuters kwamba utawala wa Rais Trump utaendelea kushirikiana na pande zote na kwamba unatarajia kuwaalika marais wa Rwanda na DRC katika Ikulu ya White House wakati mwafaka ukifika.
Waasi wa M23 wanaoungwa mkono na Rwanda mwaka huu wamepiga hatua na kuchukua baadhi ya Miji muhimu mashariki ya Congo ya Bukavu na Goma.
Hatua ya M23 kuchukua Miji hiyo imezua wasiwasi kuwa huenda mzozo wa mashariki ya DRC unaweza kuathiri nchi jirani.
Mapigano yanayoendelea kati ya jeshi la Congo na waasi wa M23 pamoja na makundi mengine yamesababisha vifo vya maelfu ya watu wakati maelfu ya wengine wakipoteza makazi yao.
Mkutano wa wiki ijayo untarajiwa kujikita katika makubaliano yalioongozwa na Marekani mwezi Juni mwaka huu ambayo yalitiwa saini na Mawaziri wa mambo ya kigeni wa Rwanda na DRC.