Kulingana na Waziri wa mambo ya ndani wa Ukraine Ihor Klymenko, shambulizi hilo lililenga jengo la ghorofa 9 katika mji wa Ternopil, uliokilomita 200 mpakani mwa nchi jirani ya Poland. Hatua hiyo imeipelekea Poland kuvifunga kwa muda viwanja vya ndege vya Rzeszow na Lublin kusini mashariki mwa nchi hiyo na kuimarisha ulinzi wa anga yake.
Klymenko amesema timu ya waokoaji bado inajaribu kuwaokoa watu waliokuwa wamenasa chini ya vifusi vya jengo hilo pamoja na kutafuta manusura wa shambulizi hilo. Ameongeza kuwa raia 66 wakiwemo watoto 16 wamejeruhiwa. Urusi ilirusha jumla ya droni 476 na makombora 48 nchini Ukraine, hii ikiwa ni kwa mujibu wa jeshi la Kiev.
Kando na mashambulizi hayo, kumeshuhudiwa pia mashambulizi mengine ya droni na makombora katika mji mwingine wa Lviv na kuilenga miundombinu ya nishati na kupelekea kaya kadhaa kukosa umeme. Urusi imesema mashambulizi hayo ni ya kujibu kile ilichotaja kuwa “vitendo vya kigaidi vya Ukraine”.
Zelensky kukutana na Erdogan kuijadili vita vya Urusi na Ukraine
Haya yanajiri wakati rais Volodymyr Zelensky, akitarajiwa kukutana na rais wa Uturuki Recep Tayyip Erdogan mjini Ankara, kama sehemu ya mpango wake wa kutafuta uungwaji mkono wa kidiplomasia katika vita vyake dhidi ya Urusi.
Rais Vladimir Putin wa Urusi hadi sasa amekataa kushinikizwa, likija katika suala la makubaliano ya amani kati yake na jirani yake, aliyoanza kumvamia kijeshi mwezi Februari 2022.
Zelensky amesema katika mazungumzo yake na Erdogan watagusia pia, uwezo wa Ukraine kufikia makubaliano ya amani akisisitiza kuwa mataifa hayo mawili yana mahusiano mazuri.
Wakati uohuo maafisa wa Uturuki wamesema kwamba mjumbe maalum wa Marekani Steve Witkof, atajiunga na Zelensky katika mazunguzo hayo lakini baadae akakanusha ujio huo.