Je, kinda wa Chelsea Estevao atafikia kiwango cha Yamal?

Imeboreshwa Dakika 17 zilizopita

Kila mshambuliaji mchanga anayesisimua anapimwa kwa kiwango cha Lionel Messi.

Vijana wawili walio katika kiwango cha juu ni Lamine Yamal – ambaye tayari ni supastaa wa kimataifa – na sasa Estevao Willian wa Chelsea.

Yamal, kama gwiji wa Argentina Messi, alitoka katika katika akademi maarufu ya Barcelona ya La Masia.

Estevao alitawazwa jina ‘Messinho’ – iliyotafsiriwa kama ‘Messi mdogo’ – kupitia mchezo wake katika ligi kuu ya Brazil, na ameanza vyema tangu ajiunge na Chelsea baada ya Kombe la Dunia la Vilabu majira ya kiangazi.

Alihama baada ya siku yake ya kuzaliwa ya 18, baada ya kukubali mkataba wa mapema mwezi Mei 2024 ambapo alijiunga kutoka Palmeiras kwa £29m, na dau la uhamisho huo kupanda hadi £ 51m pamoja na nyongeza.

Kwa kadiri rekodi zinavyoonyesha, mchezo wa Jumanne wa Ligi ya Mabingwa kati ya Chelsea na Barcelona Uwanja wa Stamford Bridge ulikuwa wa kwanza kwa Yamal kukabiliana na Estevao katika mechi rasmi. Vijana hao wenye umri wa miaka 18 walizaliwa miezi mitatu tofauti mwaka 2007.

Kwa sasa wanachukuliwa kuwa vijana wawili wenye thamani kubwa katika soka la dunia – kulingana na CIES Football Observatory, Yamal ana thamani ya £307.4m, Estevao akiwa wa pili kwa thamani ya £103.8m.

Mmoja wa watu wachache wenye uwezo wa kuwalinganisha washambuliaji hao wawili ni beki wa Chelsea, Marc Cucurella.

Amecheza na wote wawili, akimkaba Estevao kwenye Kombe la Dunia la Klabu wakati wa mechi ya mwisho ya winga huyo kwa Palmeiras.

Na siku ya Jumanne Estevao Willian alimshinda, Lamine Yamal katika ushindi wa 3-0 nyumbani dhidi ya Barcelona kwenye Ligi ya Mabingwa.

Estevao, 18, alifunga bao la pili la kushangaza baada ya wachezaji wa Barcelona kupunguzwa hadi 10 kupitia kadi nyekundu aliyopatiwa nahodha Ronald Araujo kabla ya kipindi cha mapumziko.

Cucurella alisema: “Nadhani wote wawili ni wachezaji maalum sana. Wana vipaji vingi, mara kwa mara wanataka mpira, ili kukabiliana moja kwa moja na mabeki. Ni wachezaji ambao wanaweza kuamua hatma ya mechi.

“Tofauti sasa ni kwamba Lamine amecheza Ulaya misimu michache. Estevao akiendelea na hilo, nadhani anaweza kufikia kiwango cha Lamine. Wanapenda mchezo, wanapenda mpira.”

Ni wazi kwamba wawili hao wanaweza kulinganishwa, lakini Yamal yuko mbele kwa wengi – ingawa sio wote – katika takwimu za mashambulizi.

Yamal ameimarika zaidi – akiwa katika nafasi ya pili nyuma ya Ousmane Dembele kwenye tuzo ya Ballon d’Or, alikuwa supastaa wakati Uhispania iliposhinda Euro 2024 akiwa na umri wa miaka 17 na kushinda mara mbili Kombe la Kopa, linalotunukiwa mchezaji bora chipukizi duniani.

Akiwa na umri wa miaka 16, Yamal ana uzoefu zaidi – haswa katika kiwango cha juu zaidi cha mpira wa miguu barani Ulaya.

Yamal ana mabao 31 na asisti 42 katika mechi 118 akiwa na Barcelona, ​​pamoja na mabao sita katika mechi 23 alizochezea Uhispania – na kuwa mfungaji mwenye umri mdogo zaidi wa nchi yake.

Kwa kulinganisha, Estevao ana mabao manne na asisti moja katika mechi 10 za Chelsea. Alifunga mabao 27 na kutoa asisti 15 katika mechi 83 alizoichezea Palmeiras, na ana mabao matano katika mechi 11 alizocheza Brazil.

Kwa upande wa mabao kwa kila mchezo, mabao 36 ya Estevao katika mechi 104 ni bora kuliko ya Yamal.

Ukizama zaidi katika msimu huu pekee, Estevao amecheza mechi nyingi zaidi (16 ikilinganishwa na 12), lakini Yamal ametumia dakika zaidi (978 ikilinganishwa na 657).

Kwa msingi wa kila dakika 90, Yamal yuko sawa na Estevao kwa mabao lakini ametoa pasi nyingi za mabao, amepiga mashuti zaidi, alikuwa na miguso mingi kwenye eneo la hatari, alikamilisha chenga nyingi na kutengeneza nafasi nyingi zaidi.

Hata hivyo, Estevao ana kiwango bora cha mashuti (13.8% ikilinganishwa na 11.3%) na idadi ya juu inayotarajiwa ya mabao (0.7 hadi 0.4), ikilinganishwa na mabao ya Yamal ya asisti 0.3.

Pia kuna kipengele cha kimtindo: wachezaji wote wanatumia mguu wa kushoto na wanafanya kazi kama mawinga wanaochezea ubavu wa kulia. Estevao anatarajiwa kubadilika na kuwa nambari 10 huku maisha yake ya soka yakiimarika – sawa na mchezaji mwenzake wa Chelsea Cole Palmer – huku Yamal akitarajiwa kusalia winga.

Estevao pia amefananishwa sana na mtani wake Neymar, baada ya kuvuka rekodi ya mshambuliaji huyo wa zamani wa Barcelona na PSG huko Santos na kuwa mchezaji wa kwanza wa chini ya miaka 18 kuandikisha jumla ya mabao 20 na kusaidia katika ligi kuu ya Brazil.

Meneja wa Chelsea Enzo Maresca alisema mchezaji huyo wa kimataifa wa Brazil ana mustakabali mzuri mbele yake.

“Estevao tayari anacheza katika kiwango cha juu,” alisema. “Tayari anaichezea Brazil, kwa hakika ni mdogo sana, kwa hakika anaweza kufanya mambo mengi vizuri zaidi, lakini tunampenda .

“Ni vyema kwa watu wanaopenda soka kuwatazama wachezaji kama Estevao, kama Lamine Yamal, kama Pedri, huu ni uzuri wa soka, kwa hivyo tunafurahi kwamba Estevao yuko nasi, na kwa hakika atafanya vizuri.

“Kwangu mimi binafsi jambo la muhimu zaidi kwa Estevao ni kwamba anapaswa kufurahia soka, anatakiwa kuwa na furaha, hapaswi kufikiria kuwa bora kuliko mchezaji huyu au mchezaji mwingine, lazima awe bora kuliko yeye siku baada ya siku, ajaribu kufanya kazi kwa bidii, kujiboresha.”

Estevao alitangazwa kama mchezaji mpya wa Chelsea wakati mkataba ulipokubaliwa Mei 2024.

Chelsea waliamini wamepata jibu lao kwa Yamal, lakini kulikuwa na wasiwasi juu ya kuweka pesa nyingi mbele kwa mchezaji ambaye hangeweza kujiunga nao kwa zaidi ya mwaka mmoja.

Ada ya awali ya pauni milioni 29, pamoja na nyongeza kupeleka mkataba huo kupanda hadi pauni milioni 51, tayari inaonekana kama thamani, lakini ilikuwa sababu moja ya Real Madrid, Barcelona na Bayern Munich kutoingia kwenye kinyang’anyiro hicho.

Paris St-Germain ndio klabu pekee iliyoshindana na Chelsea, lakini Estevao alikuwa na nia ya kuhamia Stamford Bridge kwa sababu ya ahadi ya dakika nyingi za mchezo katika msimu wake wa kwanza – ambayo inaambatana na nafasi yake ya kwanza ya kucheza Kombe la Dunia msimu ujao wa joto.

Ni mfano na mbinu ya muda mrefu ya Chelsea, kuwaamini wachezaji wachanga.

Mkakati huo ni muhimu kwa Chelsea, ambao wanaweka rehani mustakabali wao kwa vipaji vya vijana vinavyohusishwa na kandarasi za muda mrefu ambazo hazijawahi kushuhudiwa, huku mapato ya siku ya mechi yakiwa nyuma ya wapinzani – kwa sababu Stamford Bridge inebabe mashabiki 40,000 pekee.

Hakukuwa na wapinzani wakubwa waliogombea saini ya Cole Palmer mnamo 2023, wakati Moises Caicedo na Enzo Fernandez waliwasili kwa ada kubwa, kwa hivyo Estevao ndiye uhamisho wa kuvutia zaidi wa Chelsea katika enzi ya Todd Boehly na Clearlake Capital.

Kwa upande wa kuzoea , Estevao tayari anazungumza Kiingereza na anaishi na familia yake huko London mbali na kuanza kuendesha gari kwenda na kutoka mazoezi.