Rais wa Jamhuri ya Kidemokrasia ya Kongo (DRC) ametoa wito wa “kutambuliwa kimataifa kwa mauaji ya halaiki yanayofanywa katika ardhi ya Kongo, Septemba 8, 2025, mjini Geneva, wakati wa mkutano wa ngazi ya juu wa Umoja wa Mataifa kuhusu haki za binadamu.” Félix Tshisekedi amezungumza na kutoa wito wa kukomeshwa kwa hali ya kutokujali na uhamasishaji wa kimataifa kuhusu miaka 30 iliyopita, kwani mashariki mwa DRC imekuwa ikikumbwa na makundi yenye silaha.
Imechapishwa:
Dakika 1 Wakati wa kusoma
Matangazo ya kibiashara
Nchini Jamhuri ya Kidemokrasia ya Kongo (DRC), mamlaka zinaitaka jumuiya ya kimataifa kujitolea kutambua uhalifu unaofanywa nchini humo. Siku ya Jumatatu, Septemba 8, rais Felix Tshisekedi alizungumza katika mkutano wa ngazi ya juu kuhusu suala hili uliofanyika Geneva kwenye makao makuu ya Umoja wa Mataifa, kando ya kikao cha 60 cha Baraza la Haki za Kibinadamu.
“Tuko hapa kuvunja ukimya huu, kuinua pazia, na kutoa wito wa kutambuliwa kimataifa kwa mauaji ya halaiki yanayofanywa katika ardhi ya Kongo,” alisema rais Tshisekedi, ambaye anatoa wito wa kukomeshwa kwa hali ya kutokujali na kuhamasishwa kwa jumuiya ya kimataifa. “Mjadala tunaopendekeza umeandaliwa katika mitazamo mitatu madhubuti: mmoja, ukiwa unagusia vitendo vya mauaji ya halaiki vilivyofanywa nchini Jamhuri ya Kidemokrasia ya Kongo katika kipindi cha miaka 30 iliyopita; mtazamo wa pili, kuthibitisha kuwepo kwa mauaji ya halaiki yanayofanywa katika ardhi yetu kwa kutumia vigezo vinavyotambuliwa na sheria za kimataifa; mtazamo wa tatu, kuanzisha usanifu wa haki ya mpito unaorekebishwa kulingana na hali halisi, uhakikisho, ukweli na urekebishaji.”
Mkuu wa Nchi aliongeza: “Kwa nini sasa? Kwa sababu kizazi chetu kina jukumu la kuvunja mzunguko wa kukataa, kutokujali, na kujirudia kwa uhalifu huo. Kwa sababu kuzuia kunahitaji kwanza kutaja uhalifu na kutambua waathirika.” Pia, kwa sababu uthabiti wa eneo zima unategemea uwezo wa kusema ukweli, kumfungulia mashtaka mhalifu, kurekebisha mambo yasiyoweza kurekebishwa, na kuhakikisha kutojirudia vitendo hivyo.”
Mashariki mwa DRC, eneo linalopakana na Rwanda na tajiri wa maliasili, limesambaratishwa na vita kwa miaka 30. Ghasia zimeongezeka katika miezi ya hivi karibuni huku M23 wakichukua udhibiti wa Goma na Bukavu, miji mikuu ya mikoa ya Kivu Kaskazini na Kusini.