Zaidi ya watu 50 waliuawa wiki iliyopita katika mfululizo wa mashambulizi ya magenge nchini Haiti, kulingana na ripoti iliyotolewa siku ya Jumatatu na Mtandao wa Kitaifa wa Kutetea Haki za Kibinadamu (RNDDH). Mauaji haya yanaashiria sura mpya, ya kutisha katika mzozo wa usalama unaozidi kuwa mbaya katika nchi ya Caribbean.
Imechapishwa:
Dakika 1 Wakati wa kusoma
Matangazo ya kibiashara
Mashambulizi hayo yalifanyika Septemba 11 na 12 katika maeneo ya kaskazini mwa Port-au-Prince, RNDDH imesema katika ripoti iliyotumwa kwa shirika la habari la AFP. “Hadi kufikia Septemba 14, 2025, wahasiriwa kadhaa walikuwa bado hawajapatikana, huku miili ikiwa bado imelala vichakani, imeliwa na mbwa,” imesema.
Haiti, nchi maskini zaidi katika Ulimwengu wa Magharibi, inakumbwa na ongezeko la machafuko yanayotekelezwa na magenge. Maeneo makubwa ya mji mkuu na mikoa ya jirani yako chini ya udhibiti wa makundi yenye silaha. Hali ilizidi kuwa mbaya mwanzoni mwa mwaka 2024 wakati muungano wenye nguvu wa genge ulipoanzisha wimbi la mashambulizi yaliyoratibiwa, na kumlazimisha Waziri Mkuu wa wakati huo Ariel Henry kujiuzulu na kuachia madaraka kwa baraza la mpito la rais.
Juhudi za kurejesha hali ya utulivu, ikiwa ni pamoja na kutumwa kwa kikosi cha usalama cha kimataifa kinachoongozwa na Kenya ili kuimarisha polisi wa Haiti, hadi sasa zimeshindwa kukomesha umwagaji damu.
RNDDH imeshutumu muungano wa genge la “Viv Ansanm”, ambalo limedhibiti mji wa Cabaret tangu mwezi Machi 2024, kwa kutekeleza kile inachokiita “mauaji ya kikatili” katika mji jirani wa Laboderie, yapata kilomita 25 kaskazini mwa mji mkuu.
Umoja wa Mataifa umetoa tahadhari mara kwa mara juu ya kuzorota kwa kasi kwa hali ya usalama nchini Haiti. Katibu Mkuu wa Umoja wa Mataifa Antonio Guterres alionya mwezi uliopita kwamba mamlaka ya serikali “yanaporomoka” na kwamba udhibiti wa magenge umeenea hadi zaidi ya asilimia 90 ya mji mkuu.
Siku ya Jumapili, Guterres alilaani mauaji hayo na kuyataka mataifa kuharakisha mchango wao wa kifedha, wa kibinadamu na wa vifaa kwa Misheni ya Kimataifa ya Usaidizi wa Usalama (MMSS).