Dar es Salaam. Mgombea urais kupitia Chama cha NLD, Hassan Doyo ameahidi iwapo atapata ridhaa ya wananchi ya kuongoza Taifa, ataunda Serikali ya umoja wa kitaifa.
Amesema serikali hiyo itakuwa msingi wa kuimarisha umoja, mshikamano na maridhiano ya kitaifa, sambamba na kujenga Taifa linaloongozwa kwa uadilifu, uwazi na usawa.
Doyo ameahidi hayo katika mkutano wa kampeni jana Oktoba 3, 2025 akiwa mkoani Singida kuomba ridhaa ya Watanzania wamchague katika uchaguzi mkuu wa Rais, wabunge na madiwani wa Oktoba 29, 2025.
Amesema Serikali ya umoja wa kitaifa ndiyo suluhisho la Tanzania mpya.
Doyo amesema kupitia Serikali hiyo, NLD itatoa fursa kwa watu kutoka makundi na vyama mbalimbali kushiriki moja kwa moja katika uongozi wa nchi, jambo litakalowezesha mawazo mapya na ubunifu katika kuliongoza Taifa.
“Tunataka Tanzania yenye mshikamano katika jamii. Serikali ya umoja wa kitaifa itawaunganisha Watanzania wote bila kujali chama, kabila au dini kwa lengo la kuleta maendeleo ya pamoja. Nchi hii ni yetu sote, na kila mmoja anapaswa kushiriki kulijenga Taifa letu katika dhana ya kuleta maendeleo,” amesema.
Amesema Serikali hiyo itakuwa chachu ya kusikiliza sauti za wananchi wote, kuondoa mpasuko wa kisiasa, na kuhakikisha rasilimali za Taifa zinatumika kwa manufaa ya wote bila upendeleo.
Amesema faida za Serikali hiyo itahusisha kujenga mshikamano wa kitaifa ambapo kila Mtanzania atajiona sehemu ya serikali yake, kupunguza migawanyiko ya kisiasa na kijamii kwa kushirikisha vyama vyote na makundi mbalimbali, pamoja na kuwapa wananchi uwakilishi mpana ili changamoto na mawazo yao yasikike.
Pia, amesema Serikali itaimarisha amani na mshikikamo wa kitaifa na kuhakikisha usawa katika mgawanyo wa rasilimali ili kila mkoa na kila mwananchi anufaike na matunda ya taifa.
Doyo amesema NLD kimejengwa katika misingi ya ushirikiano na mshikamano wa kitaifa na ndicho kitakuwa kipaumbele cha serikali baada ya kushinda uchaguzi mkuu Oktoba 29.