Chanzo cha picha, Getty Images
-
- Author, Jess Anderson
- Nafasi, Mwanahabari BBC Sport
Kufikisha ushindi wa 250 katika Ligi Kuu ya England ni mafanikio yanayohitaji kusherehekewa kwa namna ya kipekee.
Na hilo ndilo Pep Guardiola anapanga kufanya baada ya ushindi wa 1-0 dhidi ya Brentford kumpa nafasi ya kujiunga na kundi la makocha wachache waliowahi kufanikisha hilo wakiwa na klabu moja tu.
Ni Sir Alex Ferguson (Manchester United) na Arsene Wenger (Arsenal) pekee waliowahi kufanikisha hilo kabla yake na tayari Guardiola ana mpango wa kuwaalika kwenye orodha ya wageni wa ndoto kwa mashabiki wa soka kusherehekea hatua hiyo.
“Ni heshima kubwa kuwa sambamba na Sir Alex Ferguson na Arsene Wenger, nitawaalika kwenye chakula kizuri cha jioni,” alisema Mhispania huyo, ambaye yuko kwenye msimu wake wa 10 na Man City.
“Ni furaha kuwa sehemu ya historia ya Premier League, nimeridhika sana. Sasa tunatafuta 250 nyingine.”
Guardiola amefikia ushindi wa 250 kwa kucheza mechi 349 za Ligi Kuu na hiyo ni kwa kasi ya rekodi mechi 55 haraka zaidi ya Ferguson (404), huku Wenger akihitaji mechi 424 kufika hatua hiyo.
Katika enzi ya Premier League, David Moyes pia ana ushindi 250 lakini ameyapata akiwa na vilabu tofauti tofauti.
Rekodi ya ‘kuvutia’ inajieleza yenyewe
Chanzo cha picha, Getty Images
Tangu ajiunge na City mwaka 2016, kocha huyo mwenye miaka 54 amewaongoza kutwaa mataji sita ya Premier League, moja la Champions League, mataji mawili ya FA Cup na manne ya Carabao Cup.
City pia walikuwa timu ya pili katika historia kutwaa Treble (mataji matatu makubwa msimu mmoja) waliposhinda EPL, UEFA Champions League na FA Cup mwaka 2023.
Lakini kumekuwa na mafanikio mengine makubwa kwenye safari ya kufikia ushindi 250 chini ya Guardiola.
Msimu wa 2017-18, City walikuwa klabu ya kwanza kufikisha pointi 100 katika msimu mmoja wa EPL – wakishinda mechi 32 kati ya 38.
Pia, wao ndio timu pekee kushinda mataji manne ya Premier League mfululizo.
Katika kipindi cha mafanikio hayo makubwa, City walikuwa wanashinda wastani wa mechi 28 kwa msimu huku Ferguson pekee akiwa na mataji mengi zaidi (13) kuliko sita ya Guardiola.
“Yeye ni mmoja wa makocha bora kabisa kuwahi kuwepo,” alisema beki wa zamani wa Man City, Micah Richards kupitia Sky Sports.
“Tukizungumza kuhusu Guardiola, siyo tu ushindi wake bali ni jinsi wanavyoshinda, jinsi alivyoibadilisha soka, ile tiki-taka yake.
“Watu wengi walisema haitafanya kazi alipokuja mara ya kwanza, na kweli msimu wa kwanza ulikuwa wa kusuasua lakini baada ya hapo waliipeleka mechi mbali zaidi.
“Ameleta wachezaji wapya, amekuwa na wachezaji walio na majeruhi, lakini viwango vimebaki vilevile.
“Klabu kushinda EPL kwa miaka minne mfululizo ni kitu cha ajabu kabisa.”
City wamekusanya zaidi ya pointi 90 kwenye misimu minne kati ya tisa kamili chini ya Guardiola jambo la kipekee, ukizingatia kabla ya kuwasili kwake, kiwango hicho kilikuwa kimefikiwa mara tano tu katika historia ya EPL.
Kocha huyo wa zamani wa Barcelona na Bayern Munich ana asilimia ya ushindi ya 71.6% kiwango cha juu kuliko kocha yeyote aliyewahi kufundisha EPL, akiwazidi Ferguson (65.2%) na Antonio Conte (62.9%) mtawalia.
Katika mechi zake 349 za EPL, timu ya Guardiola imefunga mabao 842 na kufungwa 299 pekee.
Amesaini mkataba wa kuendelea na City hadi 2027, lakini bado kuna sintofahamu juu ya mustakabali wake wa muda mrefu.
Hata hivyo, hakuna mjadala tena kuhusu ufanisi wake mkubwa aliyoiweka kwenye soka la England.
Imetafsiriwa na Mariam Mjahid