Kupitia taarifa yake fupi iliyotolewa leo na msemaji wake mjini New York Marekani, Katibu Mkuu ameunga mkono wito wa Mwenyekiti wa Tume ya Muungano wa Afrika, akihimiza wadau wote wa Madagascar kuzingatia suluhisho la amani na makubaliano katika hali ya kisiasa inayokumba nchi hiyo hivi sasa.
Ripoti kutoka nchini humo zinaonesha kwamba Rais aliye na changamoto, Andry Rajoelina, anatarajiwa kuzungumza na taifa hilo huku hofu ikizidiwa na uwezekano wa jaribio la mapinduzi.
Rais hajulikani alipo
Ingawa mahali aliko rais Andry Rajoelina kwa sasa hakujulikani, alitoa tamko Jumapili akionesha kuwa kulikuwa na nguvu zinazojaribu kuchukua madaraka kwa nguvu.
Msukosuko huu nchini Madagascar unafuatia wiki mbili za maandamano makubwa yaliyoongozwa hasa na vijana, yakiibuliwa na malalamiko kuhusu ukosefu wa ajira, kupanda kwa gharama za maisha, na ufisadi unaoendelea. Maandamano hayo yameongezeka zaidi baada ya kitengo cha jeshi chenye nguvu kuonesha kuunga mkono waandamanaji.
Harakati za vijana, zinazoitwa Gen Z Mada, zimechochewa na harakati kama hizo za kimataifa, zikiwemo maandamano ya hivi karibuni nchini Nepal na Peru.
Kwa mujibu wa duru za habari, mamia ya waandamanaji wamekusanyika katika mji mkuu wa Madagascar Antananarivo, wakiongeza shinikizo kwa Rais Rajoelina kujiuzulu.
Hali bado ni tete, na waangalizi wa kimataifa ukiwemo Umoja wa Mataifa wanaendelea kutoa wito wa utulivu huku Madagascar ikikabiliwa na kipindi muhimu kisiasa.