Serikali ya Venezuela imetangaza kufunga ubalozi wake mjini Oslo, Norway, siku chache baada ya kiongozi wa upinzani Maria Corina Machado kutunukiwa Tuzo ya Amani ya Nobel. Katika taarifa iliyotolewa Jumatatu, serikali ya Caracas ilisema hatua hiyo ni sehemu ya “marekebisho ya huduma za kidiplomasia,” bila kutaja moja kwa moja tuzo hiyo. Venezuela pia imefunga ubalozi wake nchini Australia, huku ikifungua vituo vipya vya kidiplomasia Zimbabwe na Burkina Faso, mataifa ambayo imeyataja kuwa “washirika wa kimkakati katika kupinga shinikizo la kiukiritimba.”
Wizara ya mambo ya nje ya Norway ilithibitisha kufungwa kwa ubalozi huo, ikisema haikupewa sababu maalum. “Ni jambo la kusikitisha. Licha ya tofauti zetu, Norway inataka kuendelea na mazungumzo na Venezuela,” alisema msemaji wa wizara hiyo, Cecilie Roang, kupitia barua pepe kwa AFP. Kufikia Jumatatu jioni, huduma za simu za ubalozi wa Venezuela mjini Oslo zilikuwa zimekatwa.
Maduro amuita Machado ‘mchawi wa kishetani’
Machado, mwenye umri wa miaka 58, alitunukiwa Tuzo ya Nobel kwa “kazi yake isiyochoka ya kutetea haki za kidemokrasia za wananchi wa Venezuela na juhudi za kufanikisha mabadiliko ya amani kutoka utawala wa kiimla kwenda demokrasia.” Hata hivyo, Rais Nicolás Maduro hakutaja tuzo hiyo, bali alimrejelea Machado kama “mchawi wa kishetani”, kauli ambayo serikali yake imekuwa ikitumia mara kwa mara dhidi ya wapinzani.
Machado, ambaye alizuiwa kugombea urais mwaka 2024 — uchaguzi uliomrudisha madarakani Maduro licha ya maandamano ya upinzani — alisema anaitoa tuzo hiyo kwa “wananchi wanaoteseka wa Venezuela” na kwa Rais Donald Trump, akimtaja kama “mshirika aliyechangia kwa uamuzi katika mapambano yetu.” Jumatatu usiku alitaka uchunguzi kuhusu shambulio lililowajeruhi wanaharakati wawili wa Venezuela mjini Bogotá, Colombia, akidai kuwa walilengwa na “utawala wa Maduro.”