Je, ni kwanini kuna “uadui wa kihistoria” kati ya Real Madrid na Barcelona

Mnamo Mei 13, 1902, timu ya FC Barcelona, ​​ambayo ilikuwa imeanzishwa miaka miwili na nusu mapema, ilifika katika mji mkuu, Madrid, kwa mara ya kwanza, kucheza mechi dhidi ya timu ya ndani ya Madrid ambayo ilikuwa imeanzishwa miezi miwili mapema, FC Madrid.

Hakuna aliyejua siku hiyo kuwa mechi hii ndiyo ingekuwa mwanzo wa ule ambao baadaye ungekuja kuwa mchuano mkubwa zaidi katika historia ya soka duniani.

Kwa timu ya Kikatalani, hii ilikuwa mechi ya “kawaida, rahisi” tu katika mashindano hayo, kuelekea fainali isiyoepukika dhidi ya Athletic Bilbao, kisha kuchukuliwa kuwa timu bora zaidi ya kandanda nchini Uhispania.

Ziara hii ilikuja katika hafla ya nusu fainali ya Kombe la Coronation, ambayo ilifanyika kusherehekea kutawazwa kwa Mfalme Alfonso XIII baada ya kufikisha umri wa miaka kumi na sita, “umri wa watu wengi” wakati huo, na kushika rasmi majukumu yake kama Mfalme wa Ufalme wa Uhispania.

Mashindano haya yalikuwa mashindano ya kwanza ya kandanda kujumuisha timu kutoka kote Uhispania.

FC Barcelona ilianzishwa mnamo 1899 na kundi la vijana wakaazi wa kigeni wa jiji hilo, kama matokeo ya umaarufu wa mpira wa miguu na michezo mingine kote Uingereza na Ulaya.

Kabla ya mechi yake dhidi ya Madrid, Barcelona ilikuwa na uzoefu wa miaka miwili katika soka la ushindani kupitia ushiriki wake katika Copa Macaya, mashindano ya vilabu vya Catalan yaliyoanza 1900 hadi 1903.

Timu ya kandanda ya Madrid ilianzishwa na mhandisi Mhispania Julián Palacios, ambaye anatambuliwa kuwa rais wa kwanza wa Real Madrid wakati bado ilikuwa timu isiyo rasmi kati ya 1900 na 1902. Mnamo Machi 6, 1902, Palacios alikabidhi majukumu yake kwa Juan Padrós, mtu aliyeanzisha rasmi klabu hiyo.

Wakati El -Clásico ya kwanza kati ya timu hizo mbili ilipofanyika, klabu ya Kikatalani ilikuwa na wachezaji wawili wa Uswizi, mchezaji mmoja wa Ujerumani, na wachezaji watatu wa Uingereza, wakati Madrid – ambayo baadaye ikawa Real Madrid mwaka 1920 – ilikuwa na mchezaji mmoja tu wa kigeni.

Klabu ya Madrid pia ilikuwa na uzoefu mdogo wa ushindani, ikiwa imecheza mechi chache tu za kirafiki dhidi ya timu zingine kutoka mji mkuu.

Mechi hiyo ilifanyika saa 11:00 alfajiri, kwenye uwanja wa mbio za farasi huko La Castellana, moja ya mitaa maarufu ya Madrid, ambapo kuna Uwanja wa Santiago Bernabéu leo.

Mchezaji pekee wa kigeni wa Los Blancos – ambaye amevaa nguo nyeupe tangu wakati huo – Arthur Johnson, alifunga bao la kwanza la mechi hiyo, na kuwa wa kwanza kufunga katika historia ya El Clasico.

Lakini mechi hiyo ilimalizika kwa Barcelona kushinda mabao matatu kwa moja.

Kwa ushindi huu, klabu hiyo ya Kikatalani ilifuzu kwa fainali ya michuano hiyo, ambapo wangemenyana na timu ya Basque, Athletic Bilbao, ambayo hatimaye ilishinda taji hilo. Michuano hii pia iliashiria toleo la kwanza la kile kinachojulikana sasa kama Copa del Rey.

Makabiliano kati ya timu zote za Uhispania yaliendelea katika miaka iliyofuata. Kuanzia 1902 hadi 1916, Madrid na Barcelona zilikutana mara saba, Barcelona ikishinda tano kati ya hizo, huku mechi mbili zikimalizika kwa sare.

Hatahivyo, “ugomvi” kati ya vilabu hivyo viwili ulianza na mabishano ya kwanza ya waamuzi katika pambano lao la nane.

Timu hizo mbili zilipangwa kukutana kwa sare ya mikondo miwili. Barcelona ilishinda mechi ya mkondo wa kwanza nyumbani Machi 26, 1916, 2-1, na Real Madrid ikashinda mkondo wa pili wiki moja baadaye, 4-1.

Kwa sababu muundo wa mashindano wakati huo haukutegemea tofauti ya mabao, mechi ya mchujo ilipangwa kufanyika Aprili 13, ambayo ilishuhudia moja ya mizozo ya mikubwa zaidi iliyorekodiwa kati ya vilabu hivyo viwili.

Uwanja wa Campo de O’Donnell wa Madrid ulichaguliwa kuandaa mechi hiyo, na José Ángel Berraondo, mchezaji wa zamani wa Real Madrid, aliteuliwa kuwa mwamuzi.

Wakati wa mechi hiyo, Berraundo alitoa penalti tatu kwa klabu yake ya zamani, Madrid, na kukataa bao la Barcelona.

Kipa wa Barcelona aliokoa penalti mbili, lakini Santiago Bernabéu—ambapo uwanja wa Real Madrid uliitwa baadaye—ilifunga tatu katika dakika ya 118, na kusawazisha matokeo kuwa 6-6.

Timu hizo mbili zililazimishwa kucheza mechi mpya, iliyochezeshwa tena na mwamuzi Berraondo, ambaye aliibua tena pingamizi kutoka kwa wachezaji wa Barcelona juu ya maamuzi yake, haswa kupeana mkwaju mwingine wa penalti kwa Madrid katika dakika za lala salama. Wachezaji wa Barcelona ndipo wakaamua kujiondoa kwenye mechi na michuano hiyo wakipinga.

Madrid ilifuzu kwa fainali dhidi ya Athletic Bilbao, iliyofanyika Barcelona, ​​​​ambapo baadhi ya mashabiki waliinua mabango ya kulaani mwamuzi wa Berraondo.

Timu ya Madrid ilipoteza mchezo wa fainali kwa mabao 4-0, na kwa mujibu wa baadhi ya wanahistoria wa soka la Uhispania enzi hizo, wachezaji wa Madrid walipigwa mawe walipokuwa wakitoka uwanjani.

Ligi ya Uhispania tunayoijua leo kama La Liga ilianzishwa mnamo 1929, na mechi kati ya timu hizo mbili zikawa za kawaida.

Katika miaka ya 1950 na 1960, Real Madrid iliimarisha nafasi yake kama kikosi kikuu, ikishinda Mashindano matano ya kwanza mfululizo ya Uropa, kuanzia 1956, shukrani kwa wachezaji waliochukuliwa kuwa magwiji kama vile Muajentina-Mhispania Alfredo Di Stéfano na Mhungaria Ferenc Puskás.

Ushindani kati ya Real Madrid na Barcelona pia ulianza kuchukua sura mpya, ambapo nyota wa Uholanzi Johan Cruyff aliiongoza timu ya Catalan katikati ya miaka ya 1970, na mchezaji wa Ujerumani Paul Breitner akiwa katika safu ya Real Madrid, pamoja na Wahispania Vicente del Bosque na Goyo Benito.

Timu hizo mbili ziliendelea kujumuisha nyota kutoka nchi zingine za Ulaya na Amerika Kusini kama Argentina na Brazil katika miaka iliyofuata.

Real Madrid ilishuhudia kipindi kinachojulikana kwa jina la “Galacticos” kati ya 2000 na 2006, ambapo ilisajili nyota wakubwa kutoka nje ya Uhispania, akiwemo Luis Figo wa Ureno, Zinedine Zidane wa Ufaransa, Ronaldo wa Brazil na David Beckham wa Uingereza.

Wakati huo huo, Barcelona, ilisajili majina maarufu kama vile Mbrazil Ronaldinho, Mcameroon Samuel Eto’o, Mfaransa Thierry Henry, na raia wa Ivory Coast Yaya Toure, ambayo yalichangia kuongezeka kwa hamu ya kutazama timu hizo mbili ulimwenguni.

Nyota wawili walioiwezesha El Clásico na kuiweka kileleni mwa mashindano ya soka duniani ni Cristiano Ronaldo wa Ureno na Lionel Messi wa Argentina, ambao walipishana kati ya kushinda Ballon d’Or wakati wakiwa na Real Madrid na Barcelona.

Wachezaji wengine waliong’ara pia ni pamoja na Xavi Hernandez, Andres Iniesta, Gerard Pique, Sergio Ramos, Lukas Modric, na Karim Benzema.

Mechi iliyotazamwa zaidi ya El Clásico kuwahi kutokea inaaminika kuwa ilifanyika Aprili 23, 2017, ikitangazwa katika zaidi ya nchi 185 katika watangazaji zaidi ya 50 wa kimataifa wenye haki ya Ligi ya Soka ya Uhispania (La Liga), na kufikia hadhira ya takriban watu milioni 650.

Timu hizo mbili zimecheza mechi 261 za El Clasico katika mashindano yote tangu kuanzishwa kwa La Liga, huku Real Madrid ikishinda 105 kati ya hizo, Barcelona 104, na sare 52.

Ushindi mkubwa zaidi katika historia ya El Clasico ulikuwa ushindi wa Real Madrid wa 11-1 dhidi ya Barcelona mnamo Juni 13, 1943, huko Madrid.

Hatahivyo, matokeo ya mechi hii yalibaki kuwa mada ya mabishano makubwa ya kisiasa, na shutuma za kuingiliwa kisiasa na dikteta Francisco Franco, ambaye alitawala Uhispania wakati huo, baada ya kufanya mapinduzi ya kijeshi dhidi ya serikali iliyochaguliwa ya mrengo wa kushoto, ili kuhakikisha kuwa mechi inaisha kwa njia hii.

Matokeo ya ajabu ya mechi hii yaliharibu sifa ya klabu, na tangu siku hiyo, imekabiliwa na shutuma nyingi kutoka kwa Barcelona na mashabiki wake kwamba ni “klabu rasmi ya utawala.”

Ili kuandika kile kilichotokea siku hiyo, mwandishi wa Uingereza Sid Lowe alimhoji Fernando Argilla, mchezaji wa mwisho aliye hai kushiriki mechi hiyo, kwa kitabu alichokichapisha mwaka wa 2012.

Argilla alimwambia kwamba aliitazama mechi hiyo akiwa benchi, kwa vile alikuwa kipa wa akiba wa Barcelona.

Anaongeza kuwa anakumbuka afisa wa serikali akitembelea chumba cha kubadilishia nguo kabla ya mechi: “Polisi, luteni, sijui, labda kutoka kwa Walinzi wa Raia.”

Anaongeza kuwa kumbukumbu iliyomkaa zaidi na kudumu zaidi ni: “Maelfu na maelfu ya filimbi za chuma zilizotolewa kwa mashabiki wa Madrid, shinikizo, hisia za vitisho.”

Mashabiki wa Barcelona wanaamini kuwa “polisi maalum” wa Franco waliwatembelea wachezaji wa timu ya Catalan kwenye chumba cha kubadilishia nguo kabla ya mechi kuwatishia, jambo ambalo linaweza kuelezea matokeo ya kushangaza. Hata hivyo, dhana hii haijathibitishwa rasmi na haiwezi kuthibitishwa kwa kujitegemea hii leo.

Matokeo ya mechi hii yameendelea kuwaandama Real Madrid. Baada ya kashfa ya rushwa kukumba Barcelona mwaka 2023, ikihusisha klabu hiyo kulipa jumla ya Euro milioni 8.4 kwa makamu wa rais wa zamani wa kamati ya waamuzi ya Shirikisho la Soka la Uhispania, rais wa klabu hiyo ya Catalan, Joan Laporta, alijaribu kuhalalisha kutokuwa na hatia kwa klabu yake kwa kuilaumu Real Madrid, akidai kuwa klabu hiyo kuu ilikuwa “mifumo” iliyopendekezwa na waamuzi miaka 7 iliyopita.

Hata hivyo, Real Madrid ilijibu kwa video ikishutumu Barcelona kuwa, kwa hakika, klabu ya utawala, na utawala wa Franco hasa.

Video hiyo inaonyesha mambo yaliyochaguliwa kutoka kwa utawala wa Franco, ikiwa ni pamoja na kwamba FC Barcelona ilimtunuku Franco tuzo nyingi kwa miaka mingi, Franco aliokoa klabu hiyo ya Kikatalani kutoka kwa kufilisika mara tatu, na klabu hiyo ilishinda mataji manane ya ligi na vikombe tisa wakati wa utawala wa Franco.

Inafaa kukumbukwa kuwa Franco alivutiwa na kuendeleza michezo nchini Uhispania wakati wa utawala wake, haswa mpira wa miguu, ambao aliutumia, kulingana na baadhi ya wanahistoria, kama sehemu ya mkakati wake wa sera ya kigeni, kwa lengo la “kuimarisha taswira ya kimataifa ya udikteta wake.”