Kamanda Mkuu wa Jeshi la Iran amesema kuwa, Hatujawahi kupoteza hata sekunde moja katika kuimarisha nguvu za kijeshi za Jamhuri ya Kiislamu na tunajitahidi kwa dhati kuendelea kuboresha nguvu hizo.
Kwa mujibu wa Shirika la Habari la Tasnim, maafisa wa Tume ya Masuala ya Ujenzi ya Majlisi ya Ushauri ya Kiislamu (Bunge la Iran) wamekutana na kujadiliana na Meja Jenerali Amir Hatami, Kamanda Mkuu wa Jeshi la Jamhuri ya Kiislamu ya Iran kwenye Makao Makuu ya Komandi ya Jeshi.
Akigusia jitihada zilizofanyika za kudumisha na kuimarisha nguvu za ulinzi za Jamhuri ya Kiislamu ya Iran, Meja Jenerali Hatami amesema katika mkutano huo kwamba: Miongoni mwa vipengele muhimu sana ni kile kinachohusiana na masuala ya nguvu za ulinzi, na kwa hakika hatujawahi kupoteza hata sekunde moja katika uwanja huo na tunafanya jitihada za dhati za kuendeleza na kuboresha nguvu zetu za ulinzi.
Amekumbushia nguvu za Jamhuri ya Kiislamu ya Iran zilizooneshwa wakati wa vita vya siku 12 vilivyoanzishwa na utawala wa Kizayuni na Marekani dhidi ya Iran na kusema: Hatua imara, hekima na uongozi wa kipekee wa Amirijeshi Mkuu, kujitolea, jitihada na kazi za majeshi ya Iran na tab’an mshikamano, urafiki, huruma, ufahamu na nia thabiti ya taifa zima la Iran ya Kiislamu, ndizo nguvu zilizooneshwa na Jamhuri ya Kiislamu wakati wa vita vya kulazimishwa vya siku 12 ambazo zilimfanya adui aombe kukomeshwa vita haraka sana. Tunajitahidi kudumisha na kuimarisha nguvu hizo na kuzifanya kuwa imara zaidi.