Shiriika la Hilali Nyekundu limetangaza kuwa, kwa uchache watu wanne wamepoteza maisha wakati boti mbili zilizokuwa zimebeba wahamiaji 95 zilipozama kwenye pwani ya mji wa Al Khums wa magharibi mwa Libya.
Katika taarifa iliyochapishwa kwenye ukurasa wake rasmi wa Facebook, shirika la Hilali Nyekundu limesema kwamba matukio yote hayo mawili yalitokea Alkhamisi usiku.
Limeongeza kwamba boti ya kwanza ilikuwa imebeba wahamiaji 26 wenye uraia wa Bangladesh, wanne kati yao walifariki dunia baada ya chombo chao kuzama. Boti ya pili ilikuwa imebeba wahamiaji haramu 69, wakiwemo Wamisri wawili na Wasudan 67, miongoni mwao walikuwemo pia watoto wanane.
Shirika la Hilali Nyekundu limebainisha kuwa timu yake ya masuala ya dharura, kwa kushirikiana na walinzi wa pwani na mamlaka ya usalama wa bandari ya Libya zimefanya kwa pamoja zoezi la uokoaji na kupata miili ya watu hao. Vile vile zinashirikiana katika kushughulikia kesi hizo kwa mujibu wa taratibu zilizowekwa.
Katika wiki za hivi karibuni, matukio kama hayo yamekuwa yakitokea mara kwa mara kando ya pwani ya Libya, ambapo miji ya pwani ya Libya imeshuhhudia ongezeko la juhudi za kupata miili ya wahamiaji wasio na hati za kusafiria na kuwaokoa wengine wengi waliokwama baharini wakati wakijaribu kuvuka Bahari ya Mediterania kuelekea Ulaya kwa tamaa chapwa za kupata maisha bora.
Sehemu kubwa ya wahamiaji hao haramu huishia kufa maji baharini au kuingia kwenye mikono ya magenge hatari ya magendo ya binadamu na kupigwa mnada masokoni kama bidhaa zisizo na thamani.