Kwa uchache watu 20 wamepoteza maisha katika kipindi cha siku mbili za Ijumaa na Jumamosi katika shambulio lililohusishwa na waasi wa Allied Democratic Forces (ADF) mashariki mwa Jamhuri ya Kidemokrasia ya Kongo (DRC).
Maafisa wa kijeshi wa Jamhuri ya Kidemokrasia ya Congo wamesema: Waasi hao walivamia kijiji cha Byambwe katika eneo la Lubero, Mkoa wa Kivu Kaskazini, wakafanya uporaji kwenye eneo hilo na kuchoma moto nyumba zipatazo 20. Kisha wakaelekea kwenye eneo la karibu la Mabiango, ambako hasara zaidi za binadamu na mali zimeripotiwa.
Washambuliaji hao pia walishambulia kituo cha afya huko Byambwe, na watu kadhaa walikuwa hawajulikani walipo hadi jana Jumamosi. Hadi wakati tunaandaa taarifa hii, hakukuwa na taarifa za ziada kuhusu hatima ya watu hao.
Kundi la waasi wa Uganda la ADF linaloendesha mashambulizi yake kwenye misitu ya DRC, limeongeza mashambulizi dhidi ya vijiji vya majimbo ya Kivu Kaskazini na Ituri katika miezi ya hivi karibuni huku wahanga wakubwa wakiwa ni raia wa kawaida.
Kwa mujibu wa taarifa za duru za kuaminika za DRC, mashambulizi hayo yalisababisha vifo vya watu wasiopungua 52 huko Kivu Kaskazini kati ya Agosti 9 hadi Agosti 16. Mwishoni mwa Julai, raia wasiopungua 40 waliuawa wakati wa shambulio dhidi ya kanisa moja huko Ituri.
Operesheni za pamoja za kijeshi za Kongo na Uganda dhidi ya ADF zimekuwa zikiendelea tangu mwezi Novemba 2021, lakini zimeshindwa kuzima kikamilifu mashambulizi ya waasi hao.