Waziri wa Mambo ya Nje wa Iran, Abbas Araghchi, amekemea Marekani kwa kuchochea mashindano ya silaha duniani kupitia matumizi ya mabavu waziwazi na uvunjaji wa sheria za kimataifa, akisema hakuna njia nyingine ila kujiimarisha katika “msitu” ulioundwa na Washington.
Akihutubia mkutano wa kimataifa uliopewa jina “Sheria za Kimataifa Zinashambuliwa: Uchokozi na Ulinzi” ulioandaliwa na Taasisi ya Tafiti za Kisiasa na Kimataifa mjini Tehran jana Jumapili, Araghchi alisema Rais wa Marekani, Donald Trump, aliingia Ikulu ya White House kwa falsafa ya “amani kupitia nguvu,” ambayo kwa hakika imegeuka kuwa kauli mbiu ya “ubabe kupitia mabavu.”
Araghchi ameongeza kuwa sera ya ubabe ya Marekani, ambayo ni “kurudi kwenye sheria ya msitu,” inajumuisha kubadilishwa kwa jina la Waziri wa Ulinzi kuwa Waziri wa Vita na majaribio ya silaha za nyuklia.
Ameongeza kuwa: “Rais anayejitambulisha kama rais wa amani anashambulia popote anapotaka bila sababu wala hoja, anaamuru miji kuhamishwa, anataka wengine wajisalimishe bila masharti, na anavunja na kurarua sheria zote za kimataifa, hata ahadi za watangulizi wake.”
Mwanadiplomasia huyo wa ngazi ya juu wa Iran pia ameitaja Israel kuwa ni wakala wa Marekani katika eneo la Asia ya Magharibi, akionya kuwa utawala huo unafuata tamaa zake hatari na zisizo na kikomo za kijiopolitiki kwa kushambulia misingi ya sheria za kimataifa.
Araghchi ameonya kuwa hakuna taifa lolote Asia ya Magharibi lililo salama kutokana na ndoto za kijeshi na kiusalama za Israel, kwani utawala huo umevamia nchi saba katika kipindi cha miaka miwili iliyopita na kujipatia maeneo mapya katika ukanda huo, mbali na kuendelea kukalia kwa mabavu ardhi za Palestina.
Akiashiria mashambulizi haramu ya Israel na Marekani dhidi ya Iran mwezi Juni mwaka huu, amesema Tel Aviv ilianzisha mashambulizi kabla ya raundi ya sita ya mazungumzo ya nyuklia yasiyo ya moja kwa moja kati ya Iran na Marekani mjini Muscat, hatua iliyolenga kuzuia uwezekano wa kufikiwa makubaliano kwa njia ya amani.
Aidha, Araghchi amesisitiza kuwa mashambulizi ya Israel na Marekani dhidi ya Iran, yaliyosababisha kuuawa kwa raia, makamanda kadhaa wakiwa majumbani mwao, na kulengwa vituo vya nyuklia vya amani, si tu kwamba yalifanyika kinyume na sheria za kimataifa na Mkataba wa Umoja wa Mataifa, bali pia yalikuwa shambulio kamili dhidi ya mfumo wa kuzuia kuenea silaha za nyuklia.