Mkuu wa Shirika la Nishati ya Atomiki la Iran (AEOI), Mohammad Eslami, amesema kuwa Troika ya Ulaya inayojumuisha Ufaransa, Uingereza na Ujerumani inaendeleza mwenendo wa mabavu dhidi ya Iran na imeazimia kuchukua hatua zaidi za uchokozi kuhusu suala la nyuklia la kiraia.
Akizungumza katika mkutano wa sheria za kimataifa mjini Tehran Jumapili, Eslami alieleza kuwa Shirika la Kimataifa la Nishati ya Atomiki (IAEA), Mkurugenzi Mkuu wake Rafael Mariano Grossi, Bodi ya Magavana ya shirika hilo na Baraza la Usalama la Umoja wa Mataifa walishindwa kulaani mashambulizi ya Marekani na Israel dhidi ya vituo vya nyuklia vya kiraia vya Iran wakati wa vita vya Juni.
Amesema: “Ni jambo la kusikitisha kwamba troika ya Ulaya inaendeleza tabia ile ile ya mabavu dhidi ya Iran na imeweka ajenda ya hatua za uchokozi.”
Mnamo Juni 13, Israel ilianzisha vya kichokozi dhidi ya Iran, ikiwaua makamanda wa kijeshi wa ngazi ya juu, wanasayansi wa nyuklia na raia wa kawaida. Wiki moja baadaye, Marekani pia iliingia vitani kwa kulipua vituo vitatu vya nyuklia vya Iran, kitendo kilichokiuka wazi wazi Mkataba wa Umoja wa Mataifa, sheria za kimataifa na Mkataba wa NPT.
Eslami alisisitiza kuwa shughuli za nyuklia za Iran ni wazi na zitaendelea licha ya shinikizo linaloendelea kutoka Marekani na Ulaya. Aliongeza kuwa IAEA ina sheria iliyo wazi na jukumu lake ni kuchangia teknolojia ya nyuklia kwa matumizi ya amani.
Afisa huyo mkuu wa nyuklia alibainisha kuwa Tehran imekuwa ikishirikiana kikamilifu na shirika hilo kwa zaidi ya miaka kumi, na kwamba Azimio la Baraza la Usalama la Umoja wa Mataifa namba 2231 lilimalizika rasmi Oktoba 18.
Eslami alisema kuwa vituo vya nyuklia vilivyoshambuliwa vilikuwa chini ya uangalizi wa IAEA wakati huo, na wakaguzi walikuwa wamepangiwa kutembelea moja ya maeneo hayo asubuhi ya shambulio. Alisisitiza kuwa usahihi wa mashambulizi yaliyolenga chumba maalum katika kituo cha nyuklia ulionyesha kuwa taarifa za siri zilizokabidhiwa IAEA zilitumika vibaya.
Eslami aidha alidokeza mashambulizi hayo yalilenga miundombinu ya nyuklia ya Iran, ikiwemo maeneo ya uzalishaji wa isotopu za kitabibu na kwamba hujuma hiyo haikuwa kwa hofu ya silaha za nyuklia bali kwa nia ya kuzuia maendeleo ya kiteknolojia.
Eslami alihitimisha kwa kusisitiza kuwa Marekani na mataifa ya Ulaya lazima yakomeshe undumakuwili unaotumika kuhusu kadhia ya nyukli ya Iran.