Chanzo cha picha, Getty Images
Jumuiya ya Madola imeanza rasmi mchakato wa kusaidia juhudi za maridhiano nchini Tanzania, na imemtuma Rais wa zamani wa Malawi, Dkt Lazarus Chakwera, kama Mjumbe Maalum wa Katibu Mkuu.
Dkt Chakwera anatarajiwa kuwasili Tanzania kwa ziara ya siku nne kuanzia tarehe 18 hadi 21 Novemba, ikiwa ni hatua ya mwanzo ya majadiliano na wadau mbalimbali kuhusu masuala yanayohusiana na uchaguzi na mustakabali wa maendeleo ya nchi.
Katika ziara hiyo, atakutana na viongozi wa serikali, wanasiasa, mashirika ya kiraia, viongozi wa dini na mila, pamoja na wadau wa kitaifa na kimataifa. Mazungumzo hayo yanapania kuanzisha mjadala jumuishi kuhusu maridhiano, haki za kisiasa na kuimarisha demokrasia.
Akizungumza kuhusu uteuzi huo, Katibu Mkuu wa Jumuiya ya Madola, Mh. Shirley Botchwey, alisema uongozi na uzoefu wa Dkt Chakwera vitakuwa muhimu katika kuweka msingi wa majadiliano ya kujenga kwa maslahi ya Watanzania.
Botchwey alisema ana imani kuwa mchango wa Dkt Chakwera utaimarisha amani na uthabiti nchini, kwa kuzingatia maadili ya Jumuiya ya Madola kama vile ushirikishwaji, uwazi, haki na uwajibikaji.
Kwa upande wake, Dkt Chakwera alisema ameheshimika sana kuteuliwa na kwamba, kama jirani wa Tanzania, ameifuatilia hali ya kisiasa ya nchi hiyo kwa karibu na yuko tayari kusaidia mchakato wa mazungumzo ya pamoja.
Ziara ya Dkt Chakwera inafanyika pamoja na Naibu Katibu Mkuu wa Jumuiya ya Madola, Profesa Luis Franceschi. Matokeo ya majadiliano yao yatatumika kuishauri Jumuiya ya Madola kuhusu hatua itakayofuata kupitia jukumu lake la diplomasia ya “Good Offices”.
Hatua hii inakuja wakati Tanzania inaanza safari ya kutafuta maridhiano ya kitaifa na kuimarisha misingi ya kisiasa, kijamii na kimaendeleo, huku wadau wakisubiri kuona mwelekeo wa mazungumzo hayo mapya.
Maandamano ya siku 3 kuanzia Oktoba 29 , 2025 siku ya uchaguzi, yameacha alama kubwa inayoashiria mpasuko wa kisiasa nchini humo. Watu kadhaa wamepoteza maisha, huku uharibifu mkubwa wa mali za umma na binafsi ukifanywa, ikiwemo ofisi za chama tawala cha CCM.