Mkurugenzi Mtendaji wa zamani wa Benki ya CRDB, John Rubambe ametoa ushauri na mtazamo wa kimkakati kuhusu mustakabali wa sekta ya kibenki duniani, akisisitiza umuhimu wa kuwekeza kwenye teknolojia na mifumo ya udhibiti wa vihatarishi ili kuendana na kasi ya mabadiliko ya soko.
Akizungumza mwishoni mwa wiki alipotembelea makao makuu ya benki hiyo jijini Dar es Salaam, Rubambe, aliyekuwa kinara wa mageuzi yaliyoibadilisha Benki ya Ushirika na Maendeleo Vijijini (CRDB) kuwa taasisi ya kisasa, amesema ukuaji wa benki za leo unategemea jinsi zinavyokumbatia ubunifu, uthabiti wa mifumo na upanuzi wa kimkakati kwenye masoko mapya.
Rubambe amesema hatua ya CRDB kupanua huduma zake hadi Burundi, DRC na sasa Dubai ni ushahidi kuwa benki za Afrika zinaweza kushindana kimataifa endapo zitawekeza kwenye teknolojia salama, mifumo madhubuti ya utawala na maarifa ya masoko ya kimataifa.
Ameishauri Benki ya CRDB kuendelea kuimarisha mifumo ya udhibiti wa vihatarishi, ubunifu wa huduma za kidijitali, na kuwekeza kwenye mafunzo ya wafanyakazi, akisema hayo ndiyo maeneo yanayoamua uhai wa benki katika zama za mabadiliko makubwa ya teknolojia, kuibuka kwa kampuni za kidijiti za huduma za fedha (fintech) na matumizi ya akili unde (AI) katika sekta ya fedha.
Rubambe alipokelewa na Kaimu Mkurugenzi Mtendaji, Bruce Mwile, na kufanya mazungumzo kuhusu safari ya miaka 30 ya benki hiyo, nafasi yake katika uchumi wa Tanzania, na mwelekeo wa sekta ya kibenki Afrika Mashariki.
Mwile alimueleza mstaafu huyo kuwa Benki ya CRDB inaendelea kutekeleza mikakati ya kuifanya kuwa benki inayoendeshwa kwa teknolojia na inayotumia data kufanya maamuzi ya kibiashara.
✍️ @claud_jm
#AzamTVUpdates
