Zaidi ya Wapalestina 150 wakazi wa Ukanda wa Ghaza wamehamishwa kwa ndege kutoka eneo hilo la Palestina na kupelekwa Afrika Kusini kwa namna inayotia shaka, huku mamlaka za Afrika Kusini zikieleza kwamba hazikuwa zikijua chochote na kwamba uchunguzi juu ya suala hilo ungali unaendelea.
Kwa mujibu wa Pars Today, sambamba na kuongezeka ripoti za uhamishaji watu huko Ghaza kwa namna inayotia shaka, Wapalestina wapatao 150 wamesafirishwa kwa ndege kutoka eneo hilo na kupelekwa nchini Afrika Kusini. Rais wa Afrika Kusini Cyril Ramaphosa amesema kuhusiana na kadhia hiyo kwamba, vyomo vya intelijensia vya nchi hiyo vinachunguza kuhusu kuwasili katika mazingira tatanishi huko jijini Johannesburg, ndege moja ya kukodi iliyokuwa na Wapalestina zaidi ya 150 kutoka Ghaza.
Maafisa wa Afrika Kusini wamesema, Wapalestina hao waliwasili katika Uwanja wa Ndege wa Kimataifa wa Oliver Tambo, lakini awali walikataliwa kuingia na kucheleweshwa wakibaki ndani ya ndege kwa zaidi ya masaa 10, kwa sababu paspoti zao hazikuwa zimegongwa muhuri wa kawaida wa kutokea. Lakini hatimaye wakaruhusiwa kuingia nchini humo kufuatia uingiliaji uliofanywa na shirika moja la hisani la Afrika Kusini na kutokana na moyo wa huruma na wa kuonyesha mshikamano na Wapalestina wa serikali ya nchi hiyo.
Ubalozi wa Palestina nchini Afrika Kusini umeeleza katika taarifa kwamba, safari hiyo ya ndege ilipangwa na shirika ambalo halijasajiliwa na la kitapeli.
Safari hiyo ya ajabu na tatanishi ya Wapalestina zaidi ya 150 kutoka Ghaza hadi Afrika Kusini, ambayo ilifanyika bila ya hati rasmi za kuondokea wala mihuri ya kawaida inayogongwa kwenye pasi za kusafiria, si tukio la kawaida tu bali ni sehemu ya sera pana, ya kina na ya muda mrefu ya kuwahamisha kwa lazima Wapalestina, ambayo utawala wa kizayuni wa Israel umekuwa ukiifuatilia kwa miongo kadhaa; na hivi sasa unaitekeleza kivitendo kwa msaada na uungaji mkono wa waitifaki wake.
Utawala wa Kizayuni una sababu kadhaa zinazouchochea kutekeleza njama ya kuwalazimisha kuhama Wapalestina wa Ghaza, moja kati ya zilizo muhimu zaidi ikiwa ni kupunguza idadi ya Wapalestina katika eneo hilo na kwenye Ukingo wa Magharibi. Mbinu hiyo inachukuliwa kuwa sehemu ya mpango mpana wa kubadilisha mlingano wa idadi ya watu kwa maslahi ya Tel Aviv; mpango ambao unalenga kupunguza wingi wa idadi ya Wapalestina katika maeneo yanayokaliwa kwa mabavu. Katika muktadha huo, kuwahamisha watu kwa nguvu hutumiwa kama wenzo wa kutekelezea mipango ya ujenzi wa vitongoji na kupanua zaidi uwepo wa Israel katika maeneo hayo ya ardhi ya Palestina.
Kupunguza idadi ya Wapalestina kunafungua pia njia ya kuendeleza mipango inayopingwa vikali kikanda na kimataifa na kutoa fursa ya kuzinyonya na kuzipora ardhi hizo za Wapalestina na maliasili zake. Japokuwa mwenendo huo unapingana moja kwa moja na misingi ya sheria za kimataifa na unatambuliwa katika hati nyingi za kimataifa kuwa ni ukiukaji mkubwa wa haki za binadamu, lakini viongozi wa kizayuni wameuweka kwenye ajenda zao za utekelezaji.
Kwa upande mwingine, sera hii inaiwezesha Israel kuitambulisha katika uga wa kimataifa hali mbaya ya kibinadamu ya Ghaza kama “suala la uhajiri” na hivyo kuweza kufifilisha dhima inayobeba ya jinai ya kulizingira na kulikalia kwa mabavu eneo hilo. Ukweli ni kwamba, uhamaji wa kulazimika wa Wapalestina kuelekea nchi zingine ni sehemu ya mkakati ambao Israel inauona kama suluhisho la kimya kimya la kadhia ya Wapalestina; suluhisho ambalo litabadilisha ramani ya demografia na idadi ya watu bila makelele, lakini kwa gharama ya kusababisha matokeo mabaya mno, kwa kubadilisha kikamilifu ramani ya idadi ya watu katika eneo hili.
Sera hii, bila shaka, ina historia ndefu. Tangu lilipotokea janga la Nakba la 1948, wakati Wapalestina zaidi ya laki saba walipohamishwa kwa nguvu majumbani mwao na kukimbilia nchi jirani, hadi vita vilivyofuatia vilivyosababisha mawimbi mapya ya kuhama Wapalestina na kubaki bila makazi, utawala wa kizayuni umekuwa ukitekeleza njama mbalimbali ili kuwatenganisha Wapalestina na ardhi yao.
Sera hiyo imekuwa ikifuatiliwa na Israel kupitia mipango mbalimbali, kiasi kwamba katika miezi ya hivi karibuni imeungwa mkono rasmi hata na Rais wa Marekani Donald Trump. Hata hivyo tatizo kuu kwa mtazamo wa Tel Aviv ni Muqawama na upinzani wa Wapalestina na msisitizo wao kuhusu haki yao ya kumiliki ardhi yao; lakini pia kutoungwa mkono na nchi mbalimbali duniani mpango huo wa kuwahamisha kwa nguvu Wapalestina.
Tangu utawala wa kizayuni wa Israel na Rais wa Marekani walipopendekeza waziwazi sera ya uhamaji wa lazima, sio tu nchi mbalimbali zimeipinga sera hiyo, bali pia zimeilaani. Kwa hivyo, inavyoonekana, hivi sasa viongozi wa Kizayuni wanajaribu kutekeleza sera hiyo kupitia waunganishi na kwa njia isiyo ya moja kwa moja, ambapo safari ya hivi karibuni ya ndege iliyoelekea Afrika Kusini ni mfano mmoja tu mpya wa sera ile ile ya zamani ambayo imeendelea kutekelezwa leo hii kwa mbinu ya kificho na iliyo tata zaidi.
Katika hali kama hii, safari yenye utata mkubwa ya ndege iliyoelekea Johannesburg ni kiashiria cha mchakato ambao umekuwa ukifuatiliwa kwa miaka mingi kwa siri kwa dhahiri. Tukio hili linaonyesha kwamba licha ya kupingwa kimataifa, sera za kuwalazimisha Wapalestina wahame sio tu hazijasitishwa, lakini zinaendelezwa kwa mbinu tata zaidi. Kinachoonekana leo hii kupitia mfumo wa uhamishaji wa kushangaza na usio na uwazi, ni jaribio la kuhepa mashinikizo ya kimataifa na kutekeleza mfumo uleule wa zamani; mfumo ambao, licha ya kuwagharimu mno Wapalestina, haujaweza kudhoofisha irada na azma yao ya kutetea haki yao ya kimaumbile ya kubaki katika ardhi yao.
Sasa hivi, kuliko wakati wowote ule, vitendo kama hivyo vinatukumbusha hitajio la lazima la kuwepo ufuatiliaji wa kimataifa na wa fikra za umma dhidi ya njama zinazotekelezwa kwa lengo la kubadilisha demografia na idadi ya watu wa Ghaza; njama ambazo, zisipokabiliwa na kupingwa zinaweza kuwa na matokeo yenye maafa yasiyoweza kufidika kwa mustakabali wa Palestina na eneo zima la Asia Magharibi…/