Waziri wa Fedha wa Ujerumani, Lars Klingbeil amekuwa waziri wa kwanza katika baraza jipya kuzuru China leo hii akiwa chini ya shinikizo la kuonyesha kuwa serikali inadhibiti sera yake kuhusu China huku pengo la biashara likitanuka zaidi na mtiririko wa usambazaji bidhaa ukitikisika. Maafisa wa Ujerumani wamesisitiza kuwa Klingbeil atajadili masuala makubwa ya biashara, kama vile vikwazo vya China kwenye madini adimu. Chanzo cha wizara ya fedha kimesema msimamo umeafikiwa mapema na maafisa wa Umoja wa Ulaya wanaoshughulikia sera ya biashara ya Ujerumani kama mwanachama wa umoja huo.Zaidi ya miezi sita baada ya muungano unaoongozwa na wahafidhina kuingia madarakani, Lars Klingbeil anaelekea Beijing baada ya Waziri wa Mambo ya Nje Johann Wadephul kufuta ziara yake mwezi uliopita wakati China ilipokataa mikutano mingi kwenye ajenda aliyopendekeza.