Kupitia operesheni zao na mashambulizi, kundi la itikadi kali la wapiganaji walio na misingi ya kidini la JNIM, linaimaliza nguvu serikali ya Mali mjini Bamako, kwa njia ambayo haikutazamiwa. Kulingana na Umoja wa mataifa, kundi hilo lililo na mafungamano na lile la al- qaeda linaunga mkono mwelekeo wa itikadi kali za kiislamu ndicho kitisho kikubwa na hatari zaidi kwenye eneo la sahel ambalo ni ukanda wa jangwa la sahara barani afrika.
Kundi la JNIM ambalo limekuwa likiimarisha operesheni zake kwenye eneo hilo, liliundwa mwaka 2017 pale makundi kadhaa ya jihad yalipoungana likiwemo la Katiba Macina lililo na mafungamano na lile la al kigaidi la Al qaeda. Kiongozi wa kundi ,Iyad ag Ghaly anatokea Kidal nchini Mali iliyo karibu na mpaka na Algeria. Sio rahisi kukisia idadi ya wapiganaji wa kundi la JNIM ila kulingana na taasisi ya utafiti ya Timbuktu iliyoko mjini Dakar,Senegal, kundi la Katiba Macina pekee lina wanachama wanaume kati ya alfu 5 na 8.
Akizungumza na shirika la habari la AFP, afisa wa ujasusi wa zamani wa shirika la Marekani la CIA, Michael Shurkin, wengi wao hawashiriki mapambano kila wakati ila wanaingia na kutoka. Kundi hilo ambalo lilianzia operesheni zake kaskazini mwa nchi, katika miezi kadhaa iliyopita, zimesambaa na kuliteka eneo kubwa hususan kusini na magharibi mwa nchi hiyo.
Kwa mwaka huu pekee, mashambulizi ya JNIM, yamewaua watu 2100 hadi kufikia mwanzoni mwa Novemba, idadi ambayo ni kubwa ikilinganishwa tangu mwaka 2019 zinaonyesha takwimu za shirika lisilo la kiserikali la ACLED.
JNIM yaongeza nguvu ya mashambulizi yake
Mwezi wa Agosti, kundi la JNIM liliongeza nguvu ya mashambulizi yake eneo la magharibi ya Mali ambalo lina utajiri mkubwa wa dhahabu limeelezea shirika la utafiti la Soufan Centre. Eneo hilo linapakana na Senegal, Mauritanian na Guinea pia lina umuhimu mkubwa katika operesheni za kusafirisha chakula na mafuta kwa wakaazi wa Mali isiyokuwa na bandari.
Kwa mtazamo wake JNIM inadai kulinda wakaazi kwa kusimamia vijiji kupitia makubaliano tofauti tofauti kwa kila eneo. Kwa mujibu wa Fahiraman Rodrigue Kone, mratibu wa miradi katika taasisi ya utafiti wa masuala ya usalama ya ISS, wapiganaji hao wanafanikisha operesheni hizo kwa kukusanya kodi na sheria kali wanazowawekea wakaazi. Kwa sasa kundi hilo limebadili muonekano wake na linatazamwa kuwa na malengo ya kisiasa.
Wiki mbili zilizopita, JNIM liliwaua watu 14 mjini Lere kwa madai ya kushirikiana na jeshi la serikali ya Mali. Wanachokitaka wapiganaji hao ni matumizi ya sheria kali za kiislamu kuiongoza nchi. Wanamgambo hao wanawashinikiza wasafiri wa kike na kiume kutotangamana hasa kwenye magari ya usafiri wa umma na kuwalazimisha wanawake kujifinika mitandio.
Hata hivyo malengo yao kamili hayajakuwa bayana na wachambuzi wanasema kuwa uwezekano wa kuudhibiti mji mkuu wa Bamako ni mdogo ukizingatia uwezo wao wa kijeshi na uongozi. Hata hivyo malengo, JNIM ina mifereji kadhaa ya kuwamiminia fedha ukizingatia harakati za utekaji nyara wa raia wa kigeni,wizi wa mifugo pia kukusanya kodi maalum ya zaka. Wiki mbili zilizopita, wapiganaji hao wa Jihad walilipwa dola milioni 50 kabla ya kumuachia huru mfungwa wa Emarati na washirika wake wa Iran na Pakistani. Kiwango hicho cha fedha ni kingi mno kwa wakazi wa moja ya nchi masikini zaidi duniani.