Msemaji wa serikali ya Russia amepinga taarifa za kuchochea vita zinazoenezwa katika nchi za Ulaya na kwa mara nyingine amesisitiza kwamba Moscow inachukua hatua zinazohitajika kulinda usalama wake lakini haitaki vita wala mzozo wa kijeshi na NATO.
Dmitry Peskov alisema hayo jana Jumatatu wakati alipozungumza na waandishi wa habari mjini Moscow na kuongeza kuwa, Russia itaendelea kujiimarisha kiulinzi na kujiweka tayari kwa ajili ya kujihami, ingawa haitaki vita na Jeshi la Nchi za Magharibi (NATO).
Kwa mujibu wa shirika la habari la Sputnik, Peskov amesema kwamba hivi sasa kuna mawasiliano ya kitaalamu kati ya Russia na Ukraine kuhusu kubadilishana mateka na kuongeza kuwa, kwa sasa hakuna taarifa mpya kuhusu mkutano uliotarajiwa kufanyika Istanbul Uturuki kwa ajili ya kubadilishana mateka.”
Msemaji huyo wa Ikulu ya Russia ameendelea kusisitiza kuwa jeshi la nchi yake litatoa majibu makali kwa kila shambulio litakalofanywa dhidi ya ardhi yake na kuongeza kwa kusema: “Vikosi vya kijeshi vya Russia vinaendelea kujiimarisha kiulinzi na vitaendelea kujibu mashambulizi yote yanayofanywa na vikosi vya Ukraine dhidi yake.”
Katika sehemu nyingine ya matamshi yake mbele ya waandishi wa habari, Peskov amesema kwamba haiwezekani kutabiri ni lini masharti muhimu yatatolewa kwa ajili ya mkutano kati ya marais wa Russia na Marekani lakini nchi zote hizo mbili zinasisitiza kwamba mazungumzo hayo yanapaswa kuwa ya maana na yenye utatuzi wa mambo, yasiwe ya kupoteza wakati tu.
Msemaji wa Ikulu ya Russia Kremlin amesema: “Tunatumai kwamba mazungumzo kati ya marais wa Russia na Marekani yatafanyika mara tu maandalizi yatakapokamilika na masharti muhimu yatakapotolewa na kukubaliwa na pande mbili.”