Kauli hiyo ya Rais wa Tanzania Samia Suluhu Hassan, ameitoa leo hii mara baada ya kumaliza zoezi la kuwaapisha mawaziri na manaibu waziri katika hafla fupi iliyofanyika kwenye viwanja vya ikulu ya Chamwino jijini Dodoma na kuhudhuriwa na viongozi mbalimbali wandamizi wa chama na serikali.
Katika hotuba yake iliyodumu kwa takribani dakika kumi Rais Samia amesema kuwa matukio yaliyojitokeza nchini Tanzania katika wiki za hivi karibuni yanaweza kuathiri kwa kiasi fulani taswira ya nchi kimataifa, hasa katika masuala ya kifedha na uwezo wa serikali kupata mikopo kutoka kwa taasisi za kimataifa.
“Kama mnavyojua, mara nyingi tunategemea kupata kutoka nje, mikopo kutoka kwa taasisi mbalimbali za kimataifa, mabenki ya kimataifa. Lakini yaliyotokea nchini kwetu yametutia doa kidogo, kwahiyo huwenda yakatupunguzia sifa ya kupata hiyo mikopo kwa ulahisi kama tulivyopata muhula wa kwanza wa awamu hii. Muhula wa kwanza wa awamu hii tulikuwa tunapata sana kwa sifa zetu, kwa msimamo wetu, kwa kazi tunazofanya. Lakini doa tulilojitia huwenda likaturudisha nyuma.”
Rais Samia ameongeza kusema kuwa uchumi wa Tanzania bado unategemea kwa kiwango kikubwa mikopo ya nje, na kwamba sintofahamu ya kisiasa iliyojitokeza inaweza kupunguza imani ya taasisi hizo.
Hali ya kiuchumi Tanzania huenda ikawama ngumu
Rais Samia amewaambia mawaziri hao kuwa serikali yake imejipanga kurekebisha hali hiyo na kusisitiza kwa sasa miradi ya maendeleo katika muhula wa pili wa serikali ya awamu ya sita itaanza kutekelezwa kwanza kwa nguvu za ndani za kiuchumi.
Wadadisi wa masuala ya kisiasa nchini Tanzania wanasema kuwa kauli ya Rais Samia inatoa ujumbe kwa wananchi kuwa hali kiuchumi itakuwa ngumu kwa kipindi hiki. Marcel Hamduni ni mchambuzi wa masuala ya kisiasa akiwa Mwanza Tanzania, anasema.
“Anatoa ujumbe wa moja kwa moja juu ya uzito wa uchumi ujao kwamba anawaeleza wananchi wajifunge mkwiji. Nini hasa maana yake kwamba uchumi utakuwa sio raahisi na sio mwepesi, hauendani na utamaduni tuliozoea wa kupokea nap engine serikali inalazimika kwa namna moja au nyingine kutumia njia ambazo zitakuwa za kuminya kudhibiti mambo. Kudhibiti mambo pamoja na kodi nyingine kupanda, hilo lazima tukubaliane nalo.”
Mabadiliko ya baraza la mawaziri yaliyofanywa na Rais Samia Suluhu Hassan yamekuja katika kipindi ambacho serikali inakabiliwa na changamoto za kurejesha hali ya utulivu na kuimarisha uchumi baada ya kipindi cha misukosuko ya kisiasa yaliyosababisha vifo vya watu, majeruhi na uharibifu wa mali.