Mauzo ya bidhaa za Iran barani Afrika yaliongezeka maradufu katika miezi sita ya kwanza ya mwaka huu (1404 Hijria Shamsia), na kufikia dola milioni 675.
Mnamo Septemba 15, Mohammad Reza Safari, mkuu wa Ofisi ya Afrika ya Shirika la Maendeleo ya Biashara la Iran alitangaza kuwa katika miezi mitano ya kwanza ya mwaka huu wa Kiirani, mauzo ya nje ya Iran katika bara la Afrika yameongezeka mara mbili ikilinganishwa na kipindi kama hicho mwaka uliopita, na wakati huo huo kupungua kwa bidhaa zinazoagizwa kutoka nje. Aliongeza kuwa kutokana na uwezo wa mikoa ya Iran, wazalishaji katika maeneo hayo wamehimizwa kunufaika na fursa za uzalishaji wa pamoja katika nchi za Kiafrika na hivyo kuidhaminia nchi fedha za kigeni.
Kiasi hiki cha mauzo ya nje ni sawa na asilimia 80 ya jumla ya mauzo ya nje ya mwaka jana katika bara hilo, na tunatumai kufikia rekodi isiyo na kifani katika miaka 10 iliyopita ifikapo mwisho wa mwaka, alieleza.
Huku akifafanua kuwa Afrika inahitajia mitambo, mashine na viwanda katika nyanja za kilimo, Safari ameongeza kuwa makampuni ya Iran yana uwezo unaohitajika kwa ajili ya kushirikiana na wakulima na wahusika wengine katika uwanja huo na kwamba kwa sababu hiyo, Kitengo cha Afrika kinaunga mkono miradi ya pamoja ya uzalishaji barani Afrika na kimebuni nyenzo zinazohitajika kwa ajili ya kutoa suhula kwa makampuni ya Iran.
Afrika imekuwa kitovu cha uchumi wa dunia katika miaka ya hivi karibuni; bara kubwa lenye maliasili nyingi, ardhi kubwa ya kilimo, uwezo wa madini usio na kifani, na idadi ya vijana inayoongezeka kwa kasi.
Vipengele hivi, pamoja na mwelekeo unaokua wa ukuaji wa miji na hitajio kubwa la maendeleo ya miundombinu, vimesababisha nchi nyingi zinazoinukia kiuchumi na hata mataifa yenye nguvu ya kitamaduni kutafuta kuimarisha uwepo wao katika bara hilo.
Kwa upande mwingine, nchi za Kiafrika pia sambamba na kuvutia uwekezaji kuhamisha teknolojia na kuandaa mazingira ya kuweko ushirikiano wa thabiti zinajaribu kurahisisha njia yao ya kuelekea maendeleo ya kiuchumi na kupunguza utegemezi wao wa kihistoria kwenye masoko machache.
Kwa sababu hii, msingi umewekwa kwa ajili ya ushirikiano mbalimbali wa kiuchumi, kiviwanda, kilimo, na teknolojia katika sehemu nyingi za Afrika, na kugeuza bara hilo kuwa nafasi yenye nguvu na ya kutengeneza fursa.
Katika mazingira kama hayo, Iran, kwa kuzingatia uwezo wake wa kiviwanda na kisayansi, pia imepata nafasi kubwa miongoni mwa washirika watarajiwa wa Afrika. Viwanda vya dawa na matibabu vya Iran vinaweza kukidhi mahitaji ya sehemu kubwa ya masoko ya Afrika kwa bei ya ushindani na ubora.
Kadhalika tajiriba na uzoefu wa Iran katika ujenzi wa vinu vya kuzalisha umeme, mabwawa, barabara na miundombinu ni muhimu kwa nchi ambazo ziko katika harakati za kupanua miundombinu jambo ambalo kimsingi muhimu na lenye thamani kubwa.
Katika uga wa kilimo, Iran pia inaweza kusaidia kuongeza uzalishaji wa kilimo katika nchi za Afrika kwa kutoa teknolojia zinazohusiana na umwagiliaji, uboreshaji wa mbegu, udhibiti wa wadudu na mashine nyepesi.
Sehemu nyingine ya uwezekano wa ushirikiano kati ya Iran na Afrika inahusiana na viwanda vidogo na vya kati, huduma za kiufundi na uhandisi, mafunzo ya ufundi stadi, na uhamishaji wa maarifa ya kiufundi, ambayo yanaweza kusaidia kuunda ajira endelevu kwa pande zote mbili.
Kwa hakika, kwa mtazamo wa kiuchumi, Afrika ni soko kubwa, linalokua, na ambalo halijajaa sana ambalo linaweza kuwa mahali pazuri pa kusafirisha bidhaa za Iran; soko ambalo lina anuwai kubwa ya mahitaji ya watumiaji na linaweza kusaidia kukuza mauzo ya nje yasiyo ya mafuta.
Kadhalika ushirikiano na Afrika unaweza kutoa njia mpya za uwekezaji wa pamoja, mabadilishano ya kisayansi, na kuunda mitandao mipya ya biashara.
Kwa upande mwingine, ongezeko la mauzo ya nje ya Iran yasiyo ya mafuta barani Afrika katika nusu ya kwanza ya 1404 Hijria Shamsia sio tu ni mafanikio ya kiuchumi ya muda mfupi; pia ni ishara ya mabadiliko ya kimkakati katika sera ya mambo ya nje na biashara ya Tehran. Mwenendo ambao umeweza kuvunja rekodi ya miaka kumi katika uhusiano wa Iran na Afrika na kuimarisha nafasi ya Iran katika utaratibu unaoibukia wa Kusini-Kusini.
Kwa mtazamo wa kisiasa, kuanzisha uhusiano wa karibu na nchi zinazotafuta uhuru wa kiuchumi na kisiasa kunaweza kusaidia kuimarisha nafasi ya Iran katika uga wa kimataifa na kuandaa njia ya maingiliano mapana zaidi katika asasi za kieneo na kimataifa.
Kuongezeka kwa ushirikiano kati ya Iran na Afrika ni matokeo ya muunganiko wa mahitaji na uwezo huu. Nchi za Kiafrika zinatafuta washirika ambao wanaweza kutoa teknolojia inayofaa, huduma za kutegemewa, na ushirikiano wa muda mrefu, na Iran inatafuta masoko mapya na uhusiano unaozingatia maslahi ya pande zote mbili.
Iwapo ushirikiano huu utaendelea kwa kuzingatia uelewa wa kina wa hali za ndani, kuheshimiana, mipango yenye malengo, na mbinu ya kila mmoja kunufaika, unaweza kuanzisha mfano wa mafanikio wa maingiliano ya kiuchumi na kibinadamu kati ya kanda mbili muhimu za dunia na kuchangia maendeleo endelevu ya pande zote mbili.