Lengo la safari za Zelensky ni kufufua mazungumzo yaliyokwama kuhusu kumaliza vita vya Urusi vilivyoanza takribani miaka minne iliyopita. Uturuki, ambayo iliwahi kuwa mwenyeji wa mazungumzo ya awali, imepanga kusimamia mazungumzo mapya yanayotarajiwa kusmhirikisha pia mjumbe maalum wa Marekani, Steve Witkoff.
Hata hivyo, Kremlin imesema wawakilishi wa Urusi hawatashiriki, ingawa Rais Vladimir Putin yuko tayari kushiriki mazungumzo kati ya Marekani na Uturuki.
Wakati Ukraine ikijaribu kufufua mazungumzo ya kusaka amani, hatua yake ya kununua ndege za kivita imezua mvutano mpya huku Urusi imeikosoa vikali Ufaransa kwa makubaliano hayo, ikisema yanachochea vita badala ya kuleta suluhu. Msemaji wa Ikulu ya Kremlin, Dmitry Peskov, amesema Ufaransa inaendelea kutoa msaada wa silaha kwa utawala wa Kyiv.
“Paris bado inaendelea kuchochea mzozo huu kwa kuunga mkono kijeshi. Kuhusiana na jambo hili, tunaweza tu kuonyesha masikitiko yetu. Haijalishi ndege zipi zinauzwa kwa utawala wa Kyiv, hii haitabadilisha mwenendo unaoonekana na sio tu na sisi, bali pia na wataalamu wote wa kijeshi duniani,” alisema Peskov.
Hali ya vita inazidi kuwa mbaya Ukraine
Wakati mazungumzo ya kidiplomasia yanaendelea, hali ya vita inazidi kuwa mbaya. Ukraine imezindua mashambulizi ya anga dhidi ya miundombinu ya nishati katika maeneo yanayokaliwa kwa mabavu na Urusi mashariki mwa mkoa wa Donetsk, na kusababisha kukatika kwa umeme kwa mamia ya maelfu ya watu. Urusi, kwa upande wake, imeendelea na mashambulizimakali ya makombora na droni, ikilenga gridi ya umeme ya Ukraine kwa kiwango ambacho hakijashuhudiwa kabla.
Hali hii inaonyesha ugumu wa vita vinavyoendelea huku juhudi za kidiplomasia zinagongana na mvutano wa kijeshi, athari kubwa zikionekana kwa raia ambao wanaendelea kubeba mzigo mkubwa. Zelenskyy ana ndoto ya kuona vita vikimalizika, lakini kwa sasa anajiandaa kwa majira makali ya baridi kali ikiwa ni mara ya tano tangu vita kuanza.
Wakati huo huo, dunia inasubiri kuona kama safari za Volodymyr Zelensky na mazungumzo ya Istanbul yatafungua njia ya amani, au vita vitaendelea kuchukua sura mpya.