DAR ES SALAAM; KANISA la Kiinjili la Kilutheri Tanzania (KKKT), limeingia makubaliano na Kampuni ya Unicx AI Data Limited itakayoliwezesha kanisa hilo kufanya maboresho makubwa katika mifumo yake mawasiliano, data na huduma za kanisa.
Hatua hiyo kubwa na ya kihistoria katika safari ya KKKT ya kidijitali yalisainiwa na Katibu Mkuu wa Kanisa la KKKT Tanzania, Rogath Mollel na Mkurugenzi wa kampuni ya Unicx AI Data Limited, Noel Mangoma, kama sehemu ya dhamira ya pamoja ya kuleta mageuzi ya teknolojia ndani ya kanisa na kwa jamii.
Aidha kupitia ushirikiano huo, KKKT inalenga kuimarisha mfumo wake wa kidijitali kwa kutumia teknolojia za kisasa kama, Data na Data Intelligent, Artificial Intelligence (AI), Connectivity, Digital Infrastructure na teknolojia nyingine muhimu za kisasa.
Akizungumza Mangoma amesema hatua hiyo inalenga kufungua milango kwa vijana wa Kitanzania wenye umahiri katika sekta ya teknolojia, na kuwawezesha kushiriki kikamilifu katika ujenzi wa kanisa la kisasa na taifa lenye uwezo mkubwa wa kidijitali.
“KKKT inatambua kwamba kizazi kipya cha wataalamu wa teknolojia kina nafasi muhimu katika mustakabali wa kanisa na jamii. Kupitia ushirikiano huu na Unicx AI, kanisa linaweka msingi imara wa mabadiliko ya kidijitali yatakayoboresha utoaji wa huduma kwa waumini kwa njia rahisi, salama, na zenye ubunifu,” amesema Mangoma.