Bwana Kenani Laban Kihongosi katibu wa Itikadi na uwenezi wa chama tawala CCM ametoa kauli ya chama chake kuhusiana na hali ya mambo ilivyo nchini Tanzania hivi sasa, mara baada ya kumalizika kwa uchaguzi mkuu nchini Tanzani Oktoba 29.
Akizungumza katika mkutano na wandishi wa habari jijini Dodoma, ikiwa ni mara ya kwanza tangu kumalizika kwa uchaguzi mkuu Oktoba 29, Bwana Kihongosi, amesema kuwa serikali ya Tanzania inayoongozwa na CCM inatambua uwepo wa watu wasiokuwa na nia njema na taifa hilo lililopo ukanda wa Afrika mashariki na kwamba watu hao wanalipwa pesa, ili kuichafua taswira ya Tanzania kimataifa.
Mbali na hilo aidha Bwana kihongosi amesema kuwa chama chake cha CCM sasa kinakwenda kuisimamia serikali kikamilifu na kwamba serikali haitakisimamia chama na kwamba wale wote waliopewa dhamana ya viongozi na kushindwa kutekeleza majukumu yao watachukuliwa hatua.
Kauli hiyo ya CCM inakuja wakati nchi hiyo ikikabiliwa na sintofahamu mbele ya macho ya kimataifa hasa kutokana na matukio yaliotokea kabla, wakati na mara baada ya uchaguzi mkuu Oktoba 29 mwaka huu na kusababisha vifo, majeruhi, uharibifu wa mali zikiwemo za serikali na chama tawala.